Eduard Pieters, lider di fraccion di PPA, na prome luga ta gradici minister Melvin Wyatt-Ras pa contesta preguntanan di fraccion di PPA. Sinembargo el a manda preguntanan mas profundo di siguimiento pa minister tocante e falta di un maneho efectivo pa e problematica di adictonan ambulante riba nos isla. “Maske e minister den su contestacion na preguntanan di fraccion di PPA a indica cu e maneho ta den un “fase final” di su desaroyo, datonan concreto pa acordacion y implementacion di e maneho y un base financiero ta keda falta” Eduard Pieters a declara.
Falta di claridad riba e ley y tempo
Pieters ta expresa su preocupacion riba e contestanan vago di e minister. Mientras cu e mandatario ta papia di un “prioridad halto”, den practica e ciudadano no ta mira ningun cambio. Pieters ta exigi awor un fecha limite definitivo pa implementacion di e maneho y un presentacion na Parlamento denter di un luna despues cu esaki wordo acorda. “Sin fechanan concreto, e maneho aki ta keda solamente riba papel y no tin su efecto desea” e lider di PPA a enfatisa.
Ademas, Pieters tin su dudanan riba e ley nobo cu mester reconoce adiccion como un enfermedad y cu mester habri caminda pa admision obligatorio. E parlamentario ta pidi e minister con lo bay balansa e “derecho di ayudo” di e adicto cu e necesidad di “admision obligatorio” pa proteccion di e comunidad.
Falta di capacidad y recurso
Un punto di preocupacion grandi ta e falta di capacidad di cuido. E minister mes ta reconoce cu falta recursonan importante di cuido structural, pero ainda no tin un inventarisacion di e cantidad di cama y personal cu falta pa por garantisa e cuido aki legalmente. “Pa fraccion di PPA ta incomprendibel cu no a haci un analisis financiero di e costonan pa rehabilitacion local compara cu e maneho actual di manda adictonan den exterior” Pieters a declara. Pieters kier sa tambe specificamente cuanto placa tin reserva riba presupuesto 2026 pa soluciona e faltanan structural aki den cuido di adiccion.
Cuido di salud mental bou presion
E preguntanan aki no ta para nan so. Anteriormente Pieters a expresa su preocupacion caba riba e salud mental en general na Aruba, incluyendo e listanan di espera largo na Respaldo y e scarcedad di profesionalnan manera psikiatranan y psicologonan. Ademas e falta di colabracion efectivo y eficiente entre TUR instancia di salud mental na Aruba.
Pieters ta subraya cu un maneho integral ta necesario. PPA lo sigui presiona pa transparencia y determinacion, pa asina tanto e adictonan como e comunidad di Aruba haya e cuido y seguridad cu nan merece.
