Nos ta bibando den un tempo asina dificil, cu si un hende papia algo cu bo, den cual e ta bisa cu e ta bay haci danjo na su bida, of bida di otro hende no keda keto. Avisa su famia, avisa autoridad, pasobra diabel ta un gran mentiroso, pasobra aunke hopi ta tarda pa kere, pero diabel a bini pa solamente pa horta, pa mata y pa destrui, e no ta amigo di ningun hende, tampoco, e kier tin pas cu ningun hende.
Dios ta balora nos bida inmensamento, pasobra e palabra di Dios ta bisa; Pasobra Dios a stima mundu asina tanto, cu E a duna Su Yiu unigenito, pa ken cu kere den dj’E no bay perdi ma hanja bida eterno.( Juan 3:16).
Y esey ta Dios so por hacie , pasobra ningun hende ta bay entrega nan yiu awendia pa e muri pa otro nan por biba.
Pero tambe ta para scirbi den Hebreonan 9:27 : Y mescos cu hende ta destina pa muri un biaha so y despues di esaki ta bin hucio.
E huicio aki ta sea pa bida eterna serca Senjor of pa morto eterno separa for di Senjor, tur cos ta depende con bo relacion tabata cu Senjor durante cu bo tabata na bida, si bo a kere den Cristo Hesus y entrega bo bida y acepta Cristo Hesus como bo Senjor y Salbador y duna e prome lugar of bo a rechasa e plan di salbacion cu Dios a extende pa henter mundo, esey ta nifica cu tur hende ta inclui.
Laga nos no lubida locual tin para scirbi den Juan 3:36: Esun cu kere den e Yiu tin bida eterno,ma esun cu no obedece e Yiu lo no mira bida, ma e furia di Dios ta keda riba dje.
Mundo ta bay den un direccion caminda hende a rebeldia, y no kier keda den e forma original den cual Dios a traha hende, ta tristo pa bisa pero ta berdad, hende kier demostra na Dios cu berdaderamente nan kier separa for di dje, mescos cu un yiu por dagvaard su tata y bisa e no kier carga su faam mas, asina hende kier demostra cu mental y fisico nan ta separa for di Dios.
Esaki ta parti di e gran mentira di decepcion cu Bijbel ta papia di dje den 2 Thesalonisensenan 2:1-17, cual ta algo cu mester comparti den tur cas di famia, pasobra te ainda tin hopi hende cu no ta consciente di e tempo den cual nos ta bibando.
E enemigo lo haci tur locual ta posibel pa desvia hende for di e caminda di Dios, pesey nos ta mira suicidio ta aumente, problema di salud mental ta aumenta, adiccion ta aumenta, violencia relacional ta aumenta, divorcio ta aumenta, ( awendia hende ta divorcia pasobra nan ningun di dos den cas no kier laba tayo).
Inmoralidad a aumente hende no tin temor di Dios, hende a lubida e palabra di Dios cu ta bisa den 1 Corintionan 6:19-20: Of boso no sa cu boso curpa ta e tempel di Spirito Santo, Kende ta den boso,Kende boso tin di Dios, pasobra boso no ta pertenece na boso mes,pasobra boso a wordo cumpra pa un preis: pesey glorifica Dios den boso curpa.
Tin hende ta kere cu nan por saca Spirito Santo for di nan curpa , y tuma un tempo pa parandia,
Un tempo di locura, un tempo di sensualidad, un tempo caminda nan ta desnuda nan mes pa otro por gosa di nan bunitesa y asina cay den tentacion y pica.
Laga nos balora nos bida.
Sinceramente, Pastor Marcel Balootje
