Parlamentario Xiomara Maduro, como ex Minister di Cultura, ta refuta declaracionnan di Minister Cicilia cu ta presenta un imagen incorecto riba e esfuersonan realisa anteriormente pa engrandese celebracion di dianan nacional.
Segun Minister Cicilia, e motibo pa duna dia liber ta pasobra e participacion na celebracion di dianan nacional a bay atras den ultimo añanan. Esey ta informacion incorecto y infunda. Den Gabinetenan Wever-Croes I y II, Gobierno a pone enfasis fuerte riba promocion di cultura y participacion di Pueblo, y esaki a duna su fruto.
Ministerio di Cultura a desaroya diferente material educativo pa scolnan, minister y parlamentarionan a haci diferente bishita na scolnan, gobierno a dedica dos dia na e celebracion di Dia di Betico y Dia di Himno y Bandera, cu Manifestacion Cultural un dia prome cu e dia nacional, pa asina facilita participacion mas amplio di Pueblo. Tambe ministerio di cultura a brinda sosten na barionan y a promove un agenda di actividad pa Pueblo por pasa bishita y biba su cultura. Tur esfuerso a resulta den un participacion masal di Pueblo na e celebracion di nos dianan nacional.
Actualmente, e iniciativa di Gabinete AVP FUTURO y specialmente di parti di Minister di Cultura Eman, pa celebracion di Dia di Betico ta casi inexistente, loke ta mustra cu declaracionnan haci pa Minister Cicilia no ta basa riba hecho.
Parlamentario Xiomara Maduro ta haya hopi lamentabel cu Minister Cicilia ta purba hustifica su eror di principiante, door di malinforma Pueblo riba un tema asina importante manera nos cultura y nos identidad nacional.
