Mayan mainta e hombernan Z.T., J.A., D.P. y A.F., ta presenta den Corte pa scucha sentencia di Hues. E grupo aki ta wordo acusa cu riba 3 Augustus 2025 a haci 3 atraco cu violencia y menaza hende cu arma. E lugarnan cu e grupo aki a bay haci atraco cu violencia tabata Coconuts, Calibra y Lekker. Na Calibra hasta un agente di Polis a bira victima y a wordo maltrata.
SOLO DI PUEBLO por a compronde cu Fiscal a exigi castigo pisa y tambe a exigi pa e castigo condicional cu e grupo tin, wordo poni riba e castigo cu el a exigi.
FISCAL A EXIGI CASTIGO PISA
Luna pasa, 21 Januari 2026, tratamento di e caso a tuma lugar caminda Fiscal a bisa Hues cu e caso aki ta parce un pelicula. Riba un anochi 3 Augustus 2025, 3 atraco cu violencia a sosode. Maltrato di hendenan y menaza cu arma. Fiscal ta cuestiona e hecho cu ningun di sospechosonan no ta para responsabel. Fiscal ta haya cu J.A. a haci dos atraco cu violencia y Z.T. a menaza e tata di e dos hobennan cu arma. Esaki den Coconuts caminda e victimanan ta turista.
Na Calibra, J.A. a bay ranca cadena di S., un agente di Polis y ademas di J.A., Z.T., D.P. y A.F. a maltrat’e. Tur esaki por mira riba video di seguridad. Mientras cu S. tabata benta riba suela, nan a sigui bati’e. D.P. a expresa na warda di Polis con bon el a sinti ora el a bati e agente di Polis. Fiscal a bisa cu e no ta haya Z.T., D.P. y A.F. culpabel di atraco cu violencia y a pidi Hues pa declara nan liber. Pero Fiscal si ta haya cu nan ta culpabel di maltrato pisa di S.
Na Lekker, J.A. atrobe a ranca cadena di e homber F. Despues Z.T. y D.P. a bati’e. Un rato despues Polis a detene J.A., Z.T., D.P. y a haya den e auto e cadena di F. Tin hendenan cu a bay yuda e victima F., a wordo menaza door di Z.T. cu arma. Fiscal a pidi Hues pa declara A.F. liber pasobra no por mustra cu e tabata envolvi pero si tin sospechoso cu e tabata presente.
Fiscal a sigui bisa cu Polis a sigui nan tras y a mira maniobra sospechoso cu nan a haci cu e auto. Despues di a detene nan, Polis a bay bek na altura di un lugar na Noord y a haya un pistool. Investigacion ta mustra cu e pistool a wordo benta for di e auto ora cu Polis tabata core nan tras. Tur esaki ta mustra cu ta Z.T. tabata usa e arma y D.P. a tira e arma for di e auto.
Fiscal a mustra cu tres di e victimanan tabata turista. Esnan den Coconuts. Pa cu castigo, Fiscal a bisa cu e ta tene cuenta cu posecion di arma na un lugar publico ta 21 luna di prison. Atraco cu violencia ta 24 luna di prison. Aki no ta trata di 1 sino 4 victima y cu a usa violencia caminda 3 tabata turista! J.A. (20) a admiti tur cos. Fiscal a mustra cu Z.T. ta un residivista. D.P. ta un residivista y no ta mira seriedad di su delitonan. Fiscal a remarca cu algun dia cu D.P. a wordo laga liber, e ta bolbe cay sera. Fiscal tambe a cuestiona D.P. su expresionnan na warda di Polis. Fiscal a bisa cu A.F. ta un residivista y ta bolbe haci delito den su tempo di prueba.
Fiscal a exigi 4 aña di prison pa J.A., 3 aña di prison pa D.P. di cual 6 luna ta condicional cu 3 aña di prueba. Fiscal a exigi pa Z.T., 3 aña di prison y pa A.F. 12 luna di prison. Ademas di e castigo exigi Fiscal a mustra cu A.F. a haci delito den tempo di prueba. E tabata condena pa droga y Fiscal ta exigi pa e sinta e castigo condicional riba e castigo cu e tin cu haya awor.
Fiscal tambe a pidi pa e 6 aña di prison pa intento mata na Hulanda condicional di Z.T. wordo inclui.
D.P. tambe tin carchi di castigo cu caso di maltrato severo. Apesar di a sali liber na Juli 2025, e ta cay sera na Augustus 2025 y e castigo condicional mester pone acerca di e castigo exigi.
A.F. tambe tin castigo condicional di droga cu mester inclui.
Mayan lo informa kico ta e decision di Hues.
