Contrario na e intentonan di fraccion di AVP pa stroba trabou di Parlamento, Fraccion di MEP a percura pa e reunion cu San Nicolas Business Association (SNBA) awe mainta, 5 di februari, bay door exitosamente. Mientras AVP ta perde den pleito innecesario y inhustifica di reglamento, MEP ta confirma su compromiso como e unico partido cu ta brinda oido na pueblo y ta busca solucionnan real.
Respet pa tempo y energia di nos profesionalnan
Awe mainta a keda demostra un contraste grandi den bista di henter Aruba. Mientras parlamentarionan di AVP tabata ocupa den prensa ta purba sconde nan falta di vision tras di kehonan burocratico infunda, e miembronan di Fraccion di MEP tabata presente den sala pa scucha e “Vision for San Nicolas & Surrounding Districts 2025 & Beyond” di SNBA.
Pa Fraccion di MEP, tempo y energia di tur cu ta bishita nos aki na parlamento ta sagrado. “Nos no por permiti cu pa un capricho politico di ultimo ora, nos ta manda ciudadanonan profesional cas sin scucha nan,” Fraccion di MEP a señala, haciendo referencia na e hecho cu parlamentario di AVP, sr. Clifford Heyliger a manda su bezwaar apenas ayera despues di 1:00 pm, a pesar cu e tabata sa di e reunion aki desde comienso di december caba. Nos ta reconoce e hecho cu Presidente di Parlamento a tuma nota di e bezwaar y tambe di e reacccion di e presidente di comision y a laga e reunion sigui manera plania. Esey ta bisa tur cos caba.
MEP ta e partido di solucion y progreso
E President di e Comision di Finansas, Organisacion Gubernamental, Cultura y Deporte Shailiny Tromp-Lee, a duna un ehempel di liderazgo door di mantene e reunion manera tabata planea. Na lugar di drenta den un pleito innecesario, el a habri porta pa tur parlamentario participa, incluso proponiendo pa converti e reunion den uno combina entre dos comision pa asina satisface e preocupacionnan di AVP.
Sinembargo, AVP a scoge pa e caminda di obstruccion. Door di no presenta y purba cancela e reunion, nan a demostra cu nan no ta balora e aporte significativo di SNBA y e informacion valioso cu a keda comparti cu Parlamento. MEP, di su banda, a posiciona su mes un biaha mas como e partido cu ta habri porta, cu ta scucha e preocupacion y sugerencianan di pueblo y cu ta traha activamente pa e progreso berdadero di nos pais.
Compromiso cu desaroyo di San Nicolas
E reunion di awe a sirbi pa profundisa riba temanan clave manera energia y posibilidadnan petrolero pa Aruba, temanan cu ta toca directamente e economia y e finansas di e districto di San Nicolas y Aruba henter.
Fraccion di MEP ta conclui: “Nos ta e partido cu ta trece solucion. Nos no ta perde tempo den ‘hidden agendas’ of den wega infantil di ken tin mas poder. Nos meta ta pa Aruba progresa, y pa logra esey, mester scucha esnan cu ta presenta plannan concreto na bienestar di nos pais. Mientras otronan ta purba para progreso, MEP ta cana hunto cu e pueblo pa dilanti.”
