Durante e Common Good Conference, a comparti un mensahe: e bon comun ta cuminsa den bario, cu nos hendenan mes, cu responsabilidad comparti y cu accion concreto.
Segun Noëmi Maduro y Jacklyn Agunbero, di Ministerio di Asuntonan General e momento actual ta crucial pa “kita e seyo” y activa e comisionnan di bario, duna nan no solamente un rol consultativo, pero un rol activo den creacion di proyecto y actividadnan cu ta fortalece bienestar di comunidad.
Actualmente tin cinco bario cu ya a cuminsa traha activamente: Bushiri, Port Chiquito, Village, Dakota y e Caya di Bernhardstraat. Den e barionan aki, e habitantenan mes ta carga e trabou diario di e bon comun, identificando necesidadnan y buscando solucion for di nan propio realidad.
E enfoke ta deliberadamente cu pasonan chikito, ta reconoce cu hopi problema social ta bira visibel precisamente den e bario. Ta stimula cu e ayudo y cambio no semper mester bin di ariba, pero por yega tambe for di comunidad mes, via colaboracion, empoderamento y presencia constante.
Ta traha cu situacionnan social compleho cu ta afecta hopi famia, y e meta ta pa, paso pa paso, yuda mehora bienestar general den e comunidad. Esaki ta haci no solamente cu politica, pero acompaña, cu oido y apoyo practico.
E mensahe central di e entrevista ta cu e bon comun no ta un concepto abstracto, pero un proceso bibo, construi den bario, cu hende cu ta tuma responsabilidad y cu gobierno cu ta crea e condicionnan pa esaki por florece.
Cu e iniciativa aki, ta invita otro barionan pa sigui e mesun caminda, pa forma mas comisonnan di bario y pa traha hunto pa un Aruba, caminda bienestar general ta un responsabilidad di tur.
