Minister di Finansa, Asunto Economico y Sector Primario, mr. Geoffrey Wever, a reuni cu un di e tres agencia principal di rating internacional: Fitch Ratings. E reunion a tuma lugar den cuadro di e evaluacion anual di rating di Aruba.
Agencianan di rating ta instancianan independiente cu ta analisa e capacidad di un pais (of empresa) pa cumpli cu su obligacionnan financiero. Nan ta evalua riesgo financiero, stabilidad economico y maneho fiscal.
Un rating ta directamente afecta e disponibilidad di financiamento, pero tambe e ta determina e costo di esei. Mas abou e rating, mas riesgo ta wordo perscibi, cual ta implica un tasa di interes (%) mas halto y, consecuentemente, un gasto di interes mas halto pa pais. Rating tambe ta di gran importancia pa inversionistanan cu ta busca pa inverti den sector priva. P’esey, e dialogo cu Fitch Ratings ta fundamental pa Aruba.
Actualmente, Aruba ta goza di un rating serca Fitch na nivel BBB- cu un outlook positivo. Rating den e categoria aki ta clasifica Aruba como investment grade, locual ta refleha un nivel di confiansa den maneho di finansa publico y stabilidad economico di nos pais. Un relacion bon y stabil den Reino tambe ta un factor importante pa e agencianan di rating y regularmente ta forma parti di e evaluacionnan.
Durante e evaluacion, representantenan di Fitch Ratings a sostene reunionnan cu Minister Wever y cu diferente instancia clave, manera Departamento di Finansas, Centrale Bank, CAFT, APFA, ABA, VNO y ATA, pa ricibi un panorama completo di e situacion economico y financiero di Aruba.
Minister Wever ta enfatisa e importancia di dialogo continuo entre gobierno, stakeholdernan y agencianan di rating. E mandatario a expresa su gradecimento na representantenan di Fitch Ratings pa e intercambio profesional y constructivo, y tambe na tur stakeholder local cu a contribui cu informacion y perspectiva riba un tema asina esencial manera nos finansa publico.
