Desde su publicacion na 2024 e buki pa mucha ‘Aza y e portanan magico’ ta mas popular y mas fia na biblioteca!
‘Aza y e portanan magico’ ta un produccion den cuadro di e Festival di buki pa mucha, edicion 2024 y a keda publica pa Levendig Uitgever. Liliana Erasmus a skirbi un buki pa tur mucha na Aruba. Y Daniëlle Schothorst a ilustra esaki masha bunita mes. Un buki unico, dibertido y yen di aventura na biblioteca.
“Pa Aza, lesa no ta un fiesta. Semper e tin cu comporta su mes nechi den biblioteca. Buki cu prenchi ta bay ainda, pero buki cu hopi texto…brrr. Awe Aza ta hunga cac’i sconde cu su amigonan. Gewoon den biblioteca mes! E ta sconde den Verteltoren. Pero den esey e ta ripara cu su amigonan a somenta. Ta bon mes cu e ta haya un buki cu e conoce bon: ‘Barba brabo y e Portanan magico!’ Ora Aza kier dal e buki sera, e buki ta bin na bida.”
Di tempo Liliana tabata chikito e tabata tin un amor grandi pa skirbi y pinta. E tabata mantene corespondencia cu amigo y amiganan for di tur parti di mundo. Su prome publicacion tabata tempo e tabata den di cinco klas di scol basico, pa e revista di mucha e tempo ey, ‘Matinette’, unda el a gana un premio cu su “carta di siman”. Pa hopi hende no tabata nada straño cu Liliana a bira escritor y ilustrador di buki di mucha. Liliana a nace na 1974 na Aruba. Mayoria hende na Aruba conoce como Lily Erasmus. E ta casa cu Albert y e ta mama di un yiu homber, Enric y di un yiu muhe, Alyza.
