Dialuna mainta trempan, un ekipo di Serlimar, riba peticion di Minister di Husticia mr. drs. Arthur Dowers, a inicia cu un accion di limpiesa den un di e areanan mas frecuenta pa turista na Oranjestad. Ta trata di e area di Weststraat y Werfstraat, na unda pa basta tempo caba tin acumulacion di sushi y mata cu ta creciendo for di control.
Minister Dowers a indica cu e situacion aki no ta aceptabel, specialmente den un area cu ta bon bishita diariamente door di turista. Segun e Minister, no solamente Gobierno tin responsabilidad pa mantene espacionan publico limpi, pero comerciantenan tambe tin un rol importante den cuido di e area directamente dilanti di nan negoshi.
Gobierno ta inverti den varios ploeg di limpiesa y cantidad di placa pa mantene espacionan publico den bon estado. No por ta asina cu mientras Gobierno ta haci su parti, tin negoshinan cu no ta cumpli cu nan responsabilidad y hasta ta contribui na problema di desperdicio riba caya.
E mandatario di Husticia ta aplaudi algun comerciante cu si ta tene nan espacionan limpi y den bon condicion y hasta a laga traha un “mural” bunita den e parti na banda di nan edificio, pero lamentablemente otronan ta hiba nan maneho di desperdicio di manera incorecto.
Weststraat y Werfstraat a pasa pa varios cambio positivo durante di e ultimo añanan. Comerciantenan a duna bida nobo na edificionan cu pa hopi tempo tabata bandona. Varios di e espacionan comercial aki, cu antes tabata forma parti di un area vibrante y yena cu entretenimento nocturno, awe ta transforma, entre otro, den alohamentonan tipo Airbnb. Ademas, miles di turista di crucero ta pasa door di e areanan aki practicamente tur dia.
Pa un pais cu ta profila su mes como un destinacion turistico di cinco strea, e condicion di camindanan clave manera Weststraat y Werfstraat mester refleha un nivel di calidad halto pa e espacionan publico.
Minister Dowers lo instrui autoridad competente pa investiga cua di e negoshinan den e area no ta maneha nan desperdicio na manera apropia, y cu esakinan lo por haya multa conforme nos leynan vigente.
Orden, limpiesa y respet pa espacio publico no ta opcion; ta un obligacion. Nos ta haci esaki pa proteha nos imagen como pais y pa crea un ambiente digno pa residente y bishitantenan.
