Minister Wendrick Cicilia a cumpli cu su compromiso cu e comunidad di piscado di Aruba cu e alocacion strategico di Fish Aggregating Devices (FADs) denter di e awanan teritorial di Aruba. E iniciativa aki ta dirigi na sostene nos piscadonan local door di mehora acceso na mas pisca mientras ta mehora nan siguridad riba lama.
Fishing Aggregating Devices ta structuranan poni den lama pa atrae pisca. Door di instala e aparatonan aki mas cerca di costa y dentro di awanan teritorial di Aruba, piscadonan no mester bay distancianan leu mas of aventura den awanan stranhero, reduciendo riesgo significativamente y contribuyendo na practicanan di piscamento mas sigur.
Beneficia e piscado
E iniciativa aki ta beneficia tur esnan envolvi den actividad di piscamento, sea recreativo, comercial of profesional, mientras ta duna sosten particular na e piscadonan mas vulnerabel y humilde den e sector. A determina e localidadnan di e FAD’s den consulta cu e stakeholders, garantisando cu ta tene e necesidadnan di e piscadonan completamente na cuenta.
E accion aki, ta bin despues di un reunion cu a tuma luga riba 20 di december 2025, caminda Minister Wendrick Cicilia a topa cu e piscadonan y e representantenan di organisacion di pesca pa asina por a tende nan preocupacion y prioridad. Alinea cu e compromiso aki, Minister Cicilia a indica tambe cu ta planiando mas sesion di dialogo cu e piscadonan pa garantisa compromiso y atencion continuo.
No djis promesa sino accion
“Apoya nos piscadonan ta nifica mas cu haci promesa – e ta nifica tuma accion concreto. Door di pone FAD, nos ta mehora nan siguridad, fortalece e condicionnan di bida y garantisando cu nos piscadonan ta ricibi un sosten concreto y significante”, asina Minister Cicilia a expresa.
Gabinete AVP- Futuro ta sigui duna atencion special na e sector di pesca, poniendo e necesidadnan di e piscadonan firmemente riba e agenda nacional di Aruba. E iniciativa aki tambe ta refleha e uzo efectivo di recursonan relaciona cu turismo, cu financiamento brinda door di Aruba Tourism Authority, demostrando con fondonan di turismo por sostene e comunidad local directamente.
E locacionnan oficial aproba ta:
- California: 12°41.286’ N, 70°05.266’ W (reemplaso di esun cu a perde).
- Druif: 12°38.361’ N, 70°00.301’ W.
- Eagle: 12°32.7’ N, 70°06.0’ W (na rand di e zona di cuarentena).
- Zeewijk: 12°23.949’ N, 69°56.568’ W.
- Seroe Colorado: 12°25.098’ N, 69°50.240’ W.
- Juana Morto: 12°26.712’ N, 69°46.56’ W (localidad nobo).
Pa medio di e iniciativa aki, Minister Wendrick Cicilia un biaha mas ta demostra liderazgo politico door di traduci palabranan den accion y reafirma su compromiso cu e piscadonan y nan rol esencial den economia y herencia di Aruba.
