Rond mundo, varios institucion di renombre a studia e impacto di regularisacion di migrantenan indocumenta y e conclusionnan ta similar. Un di esakinan ta e estudio academico recien di World Bank titula Empowering Migrant Women: Regularization Programs and Crime cu ta confirma cu manehonan di regularisacion y integracion no solamente ta humano y socialmente responsabel, pero tambe ta contribui directamente na mas siguridad, mas confiansa y mas stabilidad social.
Varios di e investigacionnan basa riba experencianan internacional y analisis cientifico profundo, ta mustra claramente cu regularisacion di migrantenan no ta resulta den aumento di criminalidad. Al contrario, e estudio ta indica cu despues di regularisacion, hende, specialmente muhennan migrante, ta sinti mas sigur pa reporta abuso, violencia domestico y otro forma di criminalidad. Por pensa riba crimen manera underground banking, importacion y bendemento di remedinan ilegal, pero tambe di practicanan ilegal.
Segun e estudio, na momento cu migrantenan tin status legal:
- nan ta coopera mas cu autoridad
- nan ta participa mas activamente den sociedad
- y nan ta bira mas visibel pa e pais, loke ta fortalece prevencion y proteccion
E resultado aki ta alinea directamente cu e vision di e Programa di Gobernacion di AVP-Futuro, cu ta pone enfasis riba husticia preventivo, proteccion di gruponan vulnerabel y fortalecemento di confiansa entre ciudadano y estado. Un sistema cu ta inclui y integra, ta un sistema cu ta funciona mas mihor.
Ademas, e conclusionnan di e estudio ta confirma e direccion di e programa di Hunto Pa Progreso, introduci aña pasa pa enfoca riba integracion como un proceso comparti entre gobierno y comunidad. E maneho ta parti di e principio cu por logra progreso real ora hende no ta biba den miedo ni den sombra, pero ta participa abiertamente y responsabelmente den sociedad.
Evidencia internacional ta confirma e maneho di Minister di Husticia Arthur Dowers, esta cu integracion y regularisacion no ta debilidad di un pais, pero ta fortalesa di gobernacion. Un sociedad cu ta trata hende cu dignidad, ta crea mas siguridad pa tur.
E maneho di Hunto pa Progreso ta basa riba dato y ta e caminda corecto pa garantisa orden publico, proteccion di derechonan humano y un futuro sostenibel pa nos comunidad.
