Un di e topiconan cu parlamentario Eduard Pieters di fraccion di PPA a trece dilanti, ta un situacion cu ta parce increibel pa 2026: ciudadano cu kier paga nan impuesto di auto, pero no por haci esaki, paso no tin plachi di number disponibel. Esaki no ta un caso aisla, ta un problema cu desde aña pasa a raporta y cu ainda no tin solucion structural.
Ciudadano kier cumpli pero sistema no ta funciona
Segun Eduard Pieters: “Hopi hende a acerca nos fraccion di PPA, cu nan experiencia frustrante cu Departamento di Impuesto (DIMP). E hendenan cu kier paga nan impuesto trempan, prome cu october, ta wordo informa cu nan no por paga ainda y nan mester warda. Di otro banda tin hende cu kier paga, pero debi cu no tin plachi di number nan no por haci tal. Con por ta asina cu un ciudadano cu kier cumpli cu su obligacion fiscal ta wordo frena pa e propio departamento? E situacion aki no solamente ta crea confusion, pero tambe ta perhudica directamente e ciudadano”.
E fecha di vencemento di 2 di februari 2026 a pasa y pueblo a keda sin claridad. Tin hende cu, sin plachi, no por circula legalmente y mester huur of fia auto. E pregunta legitimo ta: ken ta asumi e costo extra aki? Ken ta responsabel pa e ineficiencia di e propio departamento cu mester percura pa tur auto cumpli cu nan obligacion fiscal?
Ineficiencia no por bira normalidad
DIMP ta ricibi miyones di florin anual di contribuyente. Servicio eficiente no ta un fabor, sino ta un deber. Si DIMP tabata un compania priva, situacion manera esaki lo ya tin consecuencia severo. Pero como ta trata di un departamento publico, e ciudadano no tin opcion.
“Nos ta tende hopi palabra riba innovacion y digitalisacion dentro di departamento. Pero modernisacion no ta slogan, mester ta practica. Un sistema automatisa por regla esaki facilmente: si despues di cierto periodo un impuesto no ta paga, mester desactiva e plachi y asina duna otro usuario. Tecnologia ta existi; boluntad y accion ta loke falta.
Responsabilidad y respet pa contribuyente
“Nos por reconoce cu eror logistico por sosode, pero ora un problema persisti mas cu dos of tres luna, esaki ta revela falta di planificacion y control. No por ta asina cu e ciudadano, cu kier paga, ta termina siendo e victima di e sistema,” Eduard a vocifera.
Mirando e cuantioso yamada y mensahe cu fraccion di PPA a haya relaciona cu e topico aki, PPA ta exigi solucion inmediato y structural. “Servicio publico mester ta digno, eficiente y moderno. Ciudadano cu kier paga, no por wordo castiga pa ineficiencia administrativo. Aruba mester un sistema fiscal cu ta facilita cumplimento, no uno cu ta obstaculisa e propio contribuyente. Pasobra responsabilidad fiscal ta un caminda di dos direccion: ciudadano mester paga, pero gobierno mester duna servicio tambe,” Eduard Pieters a finalisa bisando.
