E di seis mandamento para scirbi den Bijbel ta bisa pa no mata, y suicidio ta nifica mata bo mes curpa.
Ta un tema delicado, ta un situacion doloroso, famia ta keda di shock, y yuinan ta keda traumatisa ora un di nan mayor mester tuma e decision ey, y henter e famia ta keda herida.
Pero no lubida kico palabra di Dios, ta bisa: E ladron ta bini solamente pa horta, pa mata y destrui, Ami a bini pa nan tin bida y nan tine na abundancia.( Juan 10:10).
Nos no por sinta man crusa y laga e enemigo sigi haci drama cu bida di hende, no ta importa edad,tampoco rasa, nos tin di corda cu nos tur a wordo traha den imagen y semehansa di Dios, y cu Dios a stima e mundo asina tanto cu E a duna su yiu unigenito, pa ken cu kere den dj’E no bay perdi ma tin bida eterna.
Pesey nos mester scirbi pa tur hende compronde e bondad di Dios pa nos bida y kico Dios ta bisa, pa nos evita di bay contra su palabra.
Isaias 41:10 ta para scirbi: No tene miedo pasobra Mi ta cu bo, no desmaya pasobra Mi ta bo Dios,lo Mi fortalese bo, si lo Mi yuda bo, si lo Mi sostenebo cu mi man drechi di husticia.
E enemigo su meta ta pa sembra miedo den hende, cu asina nan ta debilita mental y spiritualmente cu nan no por atende cu nan bida y asina nan ta cay den su gara, cu un final cu ningun hende ta spera.
Salmo 55:22 ta para scirbi: Tira bo carga riba Senjor y e lo sostene bo, nunca e lo no permiti pa e husto wordo movi.
Mateo 11:28 ta para scirbi: Bin serca Mi tur cu ta cansa y carga y lo Mi duna boso sosiego.
Salmo 34:18 ta para scirbi; Senjor ta serca di e hende di curason kibra, y ta salba esnan di spirito abati.
Filipensenan 4:8 ta para scirbi: Finalmente rumannan, tur loke ta berdadero, tur loke ta honorabel, tur loke ta husto,tur loke ta puro,tur loke ta bunita,tur loke ta di bon fama,si tin algun virtud,y si tin algo digno di alabansa, laga esaki ocupa boso mente.
Salmo 40:1-3 ta para scirbi: Mi a spera cu pasenshi riba Senjor,y e a inclina Su mes na mi,y a scucha mi sclamacion. E a sacami for di e pos di destruccion for di e lodo di klei. Y E a pone mi pianan riba un baranca y a haci mi pasonan firme. E a pone un cantica nobo den mi boca,un cantica di alabansa na nos Dios. Hopi lo mira esaki y teme, y lo confia den Senjor.
Salmo 94:19 ta para scirbi: Den e multitud di mi preocupacion,den mi, Bo consuelo ta alegra mi alma.
Bendiciona sea Dios y Tata di nos Senjor Hesus Cristo,e Tata di misericordia, y Dios di tur consuelo. Kende ta consola nos den tur nos afliccion,pa asina nos tambe por consola esnan cu ta den cualkier afliccion cu e mesun consuelo cu Dios a consola nos cune. ( 2 Corintionan 1:3-4).
Pero tambe nos kier recorda tur hende kico e palabra di Dios ta bisa den 1 Corintionan 3:16: Boso no sa cu boso ta tempel di Dios, y cu e Spirito di Dios ta biba den boso.Si un hende destrui e tempel di Dios, Dios lo destrui e. Pasobra tempel di Dios ta santo, y esey ta loke boso ta.
Palabra di Dios ta bolbe recorda nos cu nos no ta pertenece na nos mes.( 1 Corintionan 6:19-20),
Sinceramente, Pastor Marcel Balootje
