Minister Gerlien Croes, tabata presente dialuna anochi na un ceremonia special organisa pa Aruba Wine & Dine, caminda ocho (8) trahado a wordo certifica oficialmente como Leermeester y Leermeester Plus pa medio di Aruba Wine & Dine Academy.
Minister Gerlien Croes ta expresa su orguyo cu e logro aki, ya cu e ta representa un paso concreto den e formacion profesional na Aruba, y un ehempel bibo di con sector priva ta inverti den crecemento y desaroyo di su personal.
E trayecto di Leermeester Plus ta duna e oportunidad pa forma empleadonan pa guia y entrena otro trahado “riba trabou” (at-the-job guidance), y na mesun momento crea un caminda pa certificacion na nivel MBO-2, un diploma cu ta wordo reconoci oficialmente pa medio di SVH Nederland.
E tipo di programa aki ta forma parti di e direccion cu Aruba mester sigui tuma: mas educacion practico, mas certificacion reconoci, y mas oportunidad pa nos hoben y trahadonan pa crece den nan profesion.
Aruba Wine & Dine Academy, cu a wordo estableci cu e meta pa duna formacion y training continuo na sector di hospitalidad, ta ofreciendo un trayecto cu ta dura aproximadamente entre un aña y mey te cu dos aña, caminda e participante por avansa paso pa paso a traves di certificacion parcial, te cu nan logra un diploma completo.
Minister Gerlien Croes a expresa su gradicimento na tur partnernan cu ta haci e tipo di trayecto aki posibel, y a reconoce cu Aruba Wine & Dine Academy ta contribui activamente na profesionalisacion di e sector di servicio na Aruba y cu den futuro cercano lo purba trece mas coordinacion entre sector priva y publico riba e oportunidadnan di profecionalisacion.
Minister Gerlien Croes ta felicita e 8 graduadonan cu a culmina e programa, y ta anima nan pa sigui usa nan conocemento, disciplina y liderazgo pa forma otro y pa sigui eleva e calidad di servicio na Aruba. “E tipo di inversion aki den hende ta un di e miho inversion cu un compania por haci. Ora nos eleva nos trahadornan, nos ta eleva e sector y nos ta eleva Aruba”.
Minister y Gobierno di Aruba ta sigui compromete su mes pa stimula colaboracion cu sector priva y institucionnan educativo, cu e meta pa crea mas trayecto di certificacion, mas oportunidad pa desaroyo profesional, y un futuro mas fuerte pa nos economia y nos comunidad.
