Cana den lus ta nifica biba den obediencia na Dios, obediencia na Su Palabra, demostrando cu E tin prome lugar den nos bida, y cu Dios ta Soberano riba tur cos.
E ora ey Hesus a contesta nan: Pa un poco tempo mas e lus ta meymey di boso. Cana mientras boso tin e lus, pa scuridad no sorprende boso, esun cu ta cana den scuridad no sa na unda e ta bay.(Juan 12:35).
Mientras cu boso tin e lus, kere den e lus,pa boso bira yuinan di lus.
Ta hopi cos ta mustra bunita, agradable, famoso, excelente, den bista di hende, mientras cu den bista di Dios, nan ta cuna di scuridad, idolatria, adoracion diabolico, caminda tur sorto di perversidad, sensualidad, malicia y inmoralidad ta wordo expresa.
Si bo puntra cualkier hende cu ta cana den scuridad, of ta participa den actonan di scuridad, kico e por a sinja, e no por splicabo, pasobra e enemigo ta seya su mente pa e keda mara den scuridad.
Pesey laga nos pone e obranan di scuridad un banda,y bisti e armadura di lus.
Laga nos comporta nos mes decentemente manera den dia,no den parandiamento y den buracheria, no den inmoralidad sexual y den sensualidad,no den pleito y envidia. Ma bisti boso mes cu Senjor Hesus Cristo y no haci provision pa e carni,pa cumpli cu su mal deseonan.
Hopi biaha hende ta wordo usa pa scuridad, sin cu nan mes sa, pasobra cada biaha cu bo ta pone bo mes , como un obheto di tentacion pa pone otro trompica, no ta bunita bo ta , ta den scuridad bo ta.
Cada biaha cu bo ta envidia un persona y no kier reconoce locual cu e ta haci , bo ta den scuridad.
Si bo no por celebra crecemento di bo prohimo bo ta den scuridad.
Si bo ta sinta riba stul hunto cu hende mentiroso y vengativo y bo ta na altura di esey bo ta den scuridad.
Si bo ta desea pa kibra un matrimonio, djis pa complace bo carni bo ta den scuridad.
Canamento den lus ta e cultura di e bida Cristian,cual ta e forma di biba pa esnan cu ta stima Dios.
Ami ta e lus di mundo,esun cu sigi Mi lo no cana den scuridad,ma lo tin e lus di bida.( Juan 8:12).
Ora nos ta cana den Odio, Orguyo, Arogancia, Inmoralidad y sin temor di Dios nos ta cana den scuridad.
Envidia ,capricho y duresa di curason ta hiba hende den scuridad.
Pasobra Bo ta sende mi lampi,Senjor mi Dios ta ilumina mi scuridad.(Salmo 18:28)
Hende ta gasta cantidad di placa, pa nan participa den fiesta di scuridad, mientras cu e lus di claridad ta gratis.
Hende ta risca nan bida pa nan keda den scuridad, mientras cu E lus ta hibanan na bida eterna.
E enemigo ta pone hopi set up di scuridad, y hende ta cay aden pa motibo di arogancia, pasobra cuanto matrimonio no ta cay den otro pasobra un hende kier participa den scuridad.
Pasobra antes boso tabata scuridad, ma awor boso ta lus den Senjor, cana como yuinan di lus ( pasobra e fruta di lus ta consisti di tur bondad y husticia y berdad. No participa den obranan infructifero di scurida, sino mas bien expone nan.
Pesey mira bon con boso ta cana, no manera hende bobo,ma manera hende sabi, haciendo bon uso di e tempo pasobra dianan ta malo.
Nos ta bibando den un tempo trabahoso yena cu scuridad, caminda respet a cay na suela, y hende no tin temor di Dios.
Sinceramente, Pastor Marcel Balootje
