Dialuna marduga pa 1:31 ta exactamente 84 aria pasa cu Di Dos Guera Mundial a yega nos isla cu por poco a causa un disaster grandi cu lo a cambia nos isla por completo.
Dia 16 di februari, 1942, ta un fecha cu hamas nos por lubida. Un fecha cu nos isla a wordo involucra den e Di Dos Guera Mundial. Kende e tempo ey por a pensa cu un isla asina chikito manera di nos lo por a experiencia un guera desastroso asina. Kende di nos awe ta reflecciona y pensa riba e rol importante cu nos isla chikito aki a hunga durante e guera aki. Kende awe cu a traha na refineria di Lago, e tempo ey e refineria di mas grandi di mundo, por bati riba su pecho pa recorda con importante nan refineria tabata pa e aliadonan. Kende awe ta den tristesa recordando nan sernan keri cu cruelnnente a bay laga nan. Hopi famia no por a ni mira nan defunto pa motibo cu nan santana a resulta den fondo di lama, unda nan ta sosegando cu tur honor. Por ehempel, un famia Martijn na Boneiro a perde tres yiu homber e marduga di disaster. E perdidanan aki y otronan, a resulta den e calannidad di mas grandi cu nos pais por a experiencia den nos historia. Den apenas tres ora y pico, 47 persona ta perde nan bida.
1942-02-13 E soldanan Mericano, e U.S. Army 498th Coastal Artelliry Battalion a yega Aruba pa reemplasa e Britaniconan y a keda na Savaneta Kemp. Despues di e atake di e submarino U-156, e soldanan Mericano, staciona riba e sero na Seroe Colorado a instala cuatro arteleria di 155cnn, un spotlight grandi y dos bunker bou tera. E bunkernan aki nan tannario tabata 10X25X10 pia cu trapi, y un porta di hero. Un banki di concret rond di tres muraya y no tabatin lus paden di e dje. Tambe nan instala 22 bunker riba tera na diferente sitio den Lago Colony.
Semper mi deseo tabata pa instala un monumento di guera dedica na e 47 victinnanan aki cu cruelnnente a perde nan bida. Pa mi no tin un miho luga cu ey riba na e punto di Seroe Colorado, unda bo por mira e luga exacto cu e submarinonan a torpedea/sink tankeronan di Lago. Alabes e luga mas cerca di e sosedido.
For di aria pasa nos Comision Aruba Amenities, lidera pa Sr. Aldrich Croes, Gobierno, D.O.W., SNBA ta trahando riba e proyecto historico y cultural hopi importante aki. Un monumento y un atraccion innportnte y interesante pa nos localnan y bishitantenan di exterior.
Riba e monumento aki nos lo tin tur e nombernan di e 47 victimanan cu a perde nan bida riba e cuatro tankeronan di Lago. Tambe durante un rueda di prensa gobierno anterior a anuncia cu tur cos ta cla pa cuminsa construccion di e proyeto. Mi ta contento di lesa cu dia 23 di januari ultimo, e contratista Van Kassel a cuminsa cu e contruccion cu lo dura 60 dia pa termina.
Tambe awo, door di mi contacto, nos tin un Aruba WWII Section instala den e Madlyn & Paul Hilliard Research Library den e National WWII Museum na New Orleans, un di e mas grandinan na Merca. Nan tin tur mi informacion riba e guera loke ta concerni nos isla Aruba. Esaki ta pa hiba e mensahe, afo di nos frontera, di e rol importante cu nos isla y e refineria Lago a hunga durante e guera.
Dufi Kock 16 februari 2026
