E amor cu Dios a ofrece na nos no ta un amor temporal, pero ta un amor eterno, ta un amor di tur dia di siglo pa siglo, y e amor ta asina grandi cu E entrega Su Yiu unigenito pa nos, y e Yiu a priminti nos cu e lo bin busca nos pa caminda E ta nos tambe por ta. Oh ki gran amor ta locual Dios tin pa nos.
Y Cristo Hesus a manifesta esey den Su palabra bisando;Esun di prome ta ‘Tende O’ Israel Senjor nos Dios ta un Senjor. Stima Senjor bo Dios cu henter bo curason,y cu henter bo alma, y cu henter bo mente, y cu tur bo forsa. Y e di dos ta esaki, Stima bo prohimo manera bo mes, no tin ningun otro mandamento mas grandi cu esaki.( Marco 12:30-31).
Stima Senjor bo Dios, cu henter bo curason, y cu henter bo alma, y cu henter bo mente.( Mateo 22:37).
Stima Senjor bo Dios cu henter bo curason,y cu henter bo alma, y cu tur bo forsa, y cu henter bo mente, y bo prohimo manera bo mes.( Lucas 10;25).
Si Hesus ta ripiti mas cu un biaha con nos mester stima Dios Tata, ta pasobra esey ta deber y mandato pa nos, pa asina nos por tin comunion cu Dios tur momento.
Dios ta amor, y esun cu ta cana cu Dios ta cana den amor,pasobra esun cu no ta cana den e amor di Dios ta cana den scuridad.
E plan di enemigo ta pa wanta hende den scuridad, pa medio di orguyo y arogancia, inmoralidad y malicia, cual ta haci nan ciego pa mira e berdad , asina kere den den Dios, cual Su amor ta eterno pa nos.
Diabel no conoce amor, e no tin amor e ta un destructor, e no tin amistad cu ningun ser humano, e ta ofrece, paranda, sensualidad, buracheria, droga, y perversidad, cual final ta tristesa y dolor.
E no conoce lealtad, pasobra e ta e fuente di tur falsedad, mentira y traicion.
Hesus a contesta y bisa: Si un hende ta stima Mi, e lo warda Mi palabra y Mi Tata lo stime, y Nos lo bin serca dje, y biba serca dje.( Juan 14:23).
Den tur esaki Hesus kier mustra nos con nos tin cu stima otro, no cu dos cara, pero cu un amor firme, fiel, un amor diligente, cla pa sirbi otro,cla pa somete na otro den e amor di Cristo Hesus.
Pesey tur matrimonio mester ta un cabuya di tres cuerde, cual ta Dios , e homber, y e muher, pasobra tur matrimonio ta wordo sosteni door di Dios pasobra ta Dios a institui matrimonio, y e ta bisa e homber pa e stima su esposa manera Cristo Hesus a stima su iglesia.
Y e amor di mayor pa yiu, y di yiu pa mayor mester ta solido, amistoso, yen di confiansa, pa asina e enemigo no cohe ningun bentaha den e hogar, y e mayor por lanta e yiu den caminda di Dios, pasobra nos ta bibando den tempo trabahoso, caminda extra atencion mester wordo duna na famia.
Esun cu ta stima Dios, ta stima su famia, ningun hende por bisa cu e ta stima Dios, y e no ta trata su famia bon, ningun homber of ningun muher por maltrata otro fisico of verbal y bisa cu nan ta stima Dios. Esun cu ta stima Dios ta stima su esposo(a).
Ta Dios su mandamento pa nos kere den e nomber di Hesus Cristo y stima otro mescos cu e a ordena nos.
Sinceramente, Pastor Marcel Balootje
