Sr. Robertico Croes ta presenta su buki ‘A journey to happiness’ na Biblioteca Nacional Aruba, diaranson awor dia 18 di februari. Presentacion ta cuminsa 6or y mey y ta caba 8or y mey. E presentacion ta na Ingles. Esaki ta un invitacion pa publico en general.
Autor Robertico Croes ta explora y investiga e impacto cu turismo tin riba biaheronan y e comunidadnan cu nan ta bishita y con esaki ta duna forma na felicidad y bienestar di cada individuo. Sr. Croes ta describi e beneficionan di turismo y ta samina e efectonan multidimensional riba areanan manera cultura, medio ambiente y social, pero tambe e experencia individual di e biahero. E autor ta boga pa un acercamento balansa pa turismo y uno cu ta pone e bienestar di hende central den maneho y practica. Sigur un buki interesante pa profesionalnan den sector di turismo pero tambe studiantenan.
Dr. Robertico Croes, ta un profesor na UCF Rosen College of Hospitality Management na Orlando, Florida. Sr. Croes tabata Minister di Turismo y Asuntonan Economico di 1994 pa 1998 y Minister di Finansas di 1998 pa 2001 na Aruba. Sr. Croes ta conoci tambe como poeta. Biblioteca tin su obra ‘Potret di un cara desconoci’ (Tico Croes) den su coleccion. Esaki ta ilustra pa artista visual Giolina Henriquez. Otro obra di Sr. Croes ta ‘Alma sangra’ cu el a publica bou pseudoniem ‘Tikoli’.
Por lesa mas tocante e publicacion ‘A journey to happiness’ riba e website di e autor, roberticocroes.com. Por pidi un copia (digital??) tambe via e website aki.
