Recien Corte Superior a trata e apelacion di e homber F.vd B, contra su condena di 20 luna di prison di cual 12 luna ta condicional cu 2 aña di prueba.
SOLO DI PUEBLO por a compronde cu F. vd B. a bisa Hof cu e no tin arma y cu e hombernan P. y L. a set up contra dje. Procurador General ta haya F. vd B. culpabel y a exigi , 18 luna di prison di cual 12 luna ta condicional cu 2 aña di prueba.
HAYA PISTOOL DEN TAS
Hof a mustra cu dia 7 November 2020, Polis a bay na un bar na Ponton caminda tabatin discusion entre dos hende homber. Polis a yega y a detene e homber P. cu tabatin un arma den un tas. Ta trata aki di un pistool Caliber 32. P. a bisa e agentenan di Polis cu ta F.vd B. a bis’e tene e arma p’e. Polis a detene vd B. tambe. Hof a bisa cu e homber P. tambe a wordo condena pa posecion di arma di candela.
ACUSADO TA BISA CU TA UN SET UP
Hof a puntra vd B., pakico el a apela cu e sentencia. Segun vd B., e ta convenci cu dos homber cu ta amigo di otro, a set up contra di dje. El a bisa cu P. y e homber L. a duna declaracion contra dje. F. vd B. a bisa Hof cu e no conoce L. Hof a mustra cu ta ora cu a detene P., el a bisa di biaha cu e arma ta di vd B. Segun vd B., e no sa cana cu arma y tampoco tas. El a bisa cu e ta cana cu cartera. Hof a puntra pakico vd B. ta pensa cu P. y L. a palabra pa bisa cu e arma ta di dje. Segun vd B., Polis no tin prueba cu el a duna e arma na nan. Hof a bisa cu e dos hombernan ta hopi mas jong cu vd B. Segun vd B., e tabata 23 aña trahando cu CEA y a wordo kita door di e caso aki.
Hof a mustra cu Polis a haya e cellular di vd B. den e tas di P. Segun vd B. e discusion tabata pafor di e bar y el a laga su cellular riba mesa den e bar. E ta kere cu nan a coy su cellular for di ariba mesa.
PG A EXIGI CASTIGO
Procurador General (PG) a bisa Hof cu vd B. ta bisa cu e hombernan P. y L. a gaña riba dje cu e arma ta di dje. Polis a haya e arma den e tas di P. y un cellular. E cellular ta di vd B. P. a wordo condena na 22 luna di prison di cual 10 luna ta condicional. Na opinion di PG, P. na momento di detencion a bisa cu e arma ta di vd B. y L. tambe a confirma esey. PG a bisa cu P. ta traha cu vd B. y PG ta haya dificil cu P. ta bay gaña riba vd B. PG a bisa cu e no ta kere declaracion di vd B. cu ta e hombernan a coy su cellular. PG ta kere cu e tas ta di vd B. PG a mustra cu como miembro di CEA, vd B. tabatin un arma ilegal. E ta haya cu no tabatin motibo pa a apela e sentencia. El a exigi pa Hof condena vd B. na 18 luna di prison di cual 12 luna ta condicional cu 2 aña di prueba.
ABOGADO
Abogado mr. Steward a bisa Hof cu no tin prueba cu vd B. tabatin un arma di candela. Na opinion di mr. Steward, no por kere declaracion di P. y L. y ta haya cu no tin prueba di sosten. E abogado ta haya cu e dos hombernan P. y L., a tira e responsabilidad riba vd B. El a sigui bisa cu e declaracion di P. y L. ta contradictorio.
E abogado a mustra cu e homber L. a wordo declara liber siendo cu e tabata hunto cu P. El a bisa cu no a haya finger print di vd B. riba e arma. E abogado ta haya cu no tin indicacion cu e arma ta di vd B. El a mustra cu a haya e arma serca P. E abogado ta haya cu Hof mester declara vd B. liber. E abogado a bisa Hof cu vd B. tabata traha cu CEA y door di e caso aki, el a wordo kita. E abogado ta lamenta cu e caso a tarda asina hopi pa wordo trata caminda a laga vd B. den incertidumbre.
Hof a bisa cu ta bay studia e caso y dia 4 Maart 2026 lo dicta sentencia via video conference.
