Dialuna mainta miembronan di Fraccion di AVP, Jennifer Arends-Reyes, Stephany Sevinger y Dennerich Kelly a haci un bishita na Fundacion Respaldo, un organisacion cu ta ehecuta un rol esencial den e sosten y guia di personanan cu ta enfrenta reto relaciona cu salud mental riba nos isla.
Durante e bishita, e parlamentarionan a haya un presentacion amplio pa mira di cerca e trabounan cu ta haci diariamente, puntra tocante e desafionan cu nan ta enfrenta, y tambe pa expresa nos profundo respet y apreciacion pa nan dedicacion den e lucha contra problema di salud mental na Aruba.
Salud mental no por keda un tema secundario. E ta un prioridad real cu ta toca famia, mucha, hoben y adulto. Fraccion di AVP ta kere firmemente cu tin mester di mas inversion den prevencion, mas sosten pa organisacionnan cu ta haci e trabou riba veld y mas acceso na servicionan profesional pa tur persona cu tin necesidad.
Fraccion di AVP ta reafirma su compromiso pa sigui traha na Parlamento pa fortifica e maneho di salud mental, amplia colaboracion cu sectornan y garantisa cu ningun hende no keda atras.
Huntu nos por construi un Aruba mas fuerte, mas consciente y mas solidario. Fraccion di AVP ta gradici Caroline Hart y Dr. Kingsale di Respaldo pa nan tempo y trabou.
