Parlamentario Eduard Pieters, di fraccion di PPA, a cumpli cu su deber constitucional y a presenta shete pregunta cla y structura riba e topico di salud mental na Aruba. Basa riba e contestanan oficial di ministerio, firma pa Minister M.G. Wyatt-Ras (30 januari 2026), ta reconoce e escases di profesional y e presion riba henter e sistema. Sinembargo e preocupacion ta escala, ya cu ta den tur e contestanan por interpreta cu tin hopi intencion, pero poco accion concreto y hopi descripcion di proceso, pero poco compromiso cu por midi.
Plan integral sin linea di tempo
Segun Pieters, “Gobierno ta papia di: maneho integral di cadena di cuido, protocolonan, mihor intercambio di informacion y integracion entre proveedor priva, AZV y sector social, pero tur esaki ta positivo solamente den teoria. Unda e meta y linea di tempo of fase di cada accion ta? Aruba no por keda satisfecho cu djis un discurso administrativo, ora cu nos ta trata di salud mental y adiccion, ya cu ta dos crisis social cu ta creciendo diariamente.” Si nos ta confrontando un “falta enorme di profesional califica”, manera minister mes ta indica, nos mester por wak accion y resultado, no djis coordinacion.
Lista di espera: sin fecha, sin garantia
Gobierno ta indica cu e lista di espera lo wordo maneha y reduci “unda ta posibel”, cu prioridad pa e casonan mas urgente. Pero ora Pieters a pidi plazo concreto, e contesta ta: ‘no por duna un fecha exacto’. E tempo di espera pa GGZ specialisa ta di 2 te 3 luna, segun minister su contestacion.
Y pa hende cu ta den crisis, tres luna no ta un espera normal, sino un eternidad. Sin plazo, sin meta cuantificabel, pueblo no por midi progreso.
Infrastructura: opcion habri, decision no tuma
Riba pregunta tocante construccion of ampliacion pa Respaldo, minister ta bisa cu “no ta exclui ningun opcion”, pero cada decision mester ta sostene pa un business case solido. Ta corecto cu inversion mester ta responsabel. Pero despues di aña di advertencia y un demanda urgente cu ta crece y cu e proyeccionnan alarmante, con leu nos ta cu decision real? Respaldo a pidi un peticion pa tereno pa construi edificio nobo, pero e contesta: “lo tuma su debido tempo”. Salud mental no ta un luho cu por warda. Ta un urgencia social.
Cuido ambulante y prevencion: bon intencion, falta urgencia
Eduard a sigui elabora cu Minister ta menciona fortalecemento di cuido ambulante, dagbesteding, groepstherapie y e unidadnan intensivo. Esaki ta e direccion corecto, pero e pregunta politico ta keda: ki inversion concreto ta asigna pa 2026? Kico ta e presupuesto adicional? Kico ta e target di reduccion di internacion?
Pieters su posicion ta cla: cada florin di belasting mester traduci den acceso mas rapido, cuido mas humano y menos presion riba hospital.
Salud mental no ta djis un documento sino bida humano
E carta oficial ta confirma cu gobierno ta reconoce problema. Pero reconocimento no ta solucion. Aruba ta riba e caminda pa un poblacion mas embeheci, mas presion social y mas reto di adiccion. Sin plan cu fecha, sin meta midibel y sin inversion acelera, nos ta core riesgo di un crisis structural.
Finalmente Eduard Pieters kier enfatisa, cu fraccion di PPA no ta busca polemica, sino ta busca accion y resultado. Salud mental y adiccion mester ta trata como prioridad nacional, no como capitulo administrativo. Pueblo merece mas cu djis un promesa di coordinacion. Pueblo merece liderazgo, decision y plazo cla. Eduard Pieters lo sigui exigi claridad y accion. Pasobra na final, no ta trata di protocol of business case, ta trata di dignidad humano, di nos famianan y di nos futuro como pais.
