La Quinta Beach Resort, den colaboracion cu Buurtzorg Aruba, conoci pa duna cuido di enfermeria na cas, a anuncia oficialmente e introduccion di un Programa Integral di Salud pa su empleadonan.
Cu e iniciativa aki, La Quinta ta marca un paso importante den e evolucion di sector turistico na Aruba, un paso cu ta pone capital humano na centro di su strategia den e industria hotelero.
Turismo ta e pilar economico principal di Aruba. Pero e forsa real tras di e industria aki ta e hende cu cada dia ta brinda servicio, hospitalidad y atencion personal. Reconociendo esaki, La Quinta ta scoge pa inverti directamente den bienestar di su empleadonan como parti di su vision di turismo sostenibel y responsabel cu no solamente mester conta pa turista, pero tambe dunadonan di trabou den e industria.
For di 1 di maart 2026, Buurtzorg Aruba lo realisa chekeo di salud trimestral na e resort.
E chekeo lo inclui, entre otro:
- Midi preshon di sanger
- Test di colesterol
- Midi nivel di sucu den sanger
- Calculacion di BMI
- Evaluacion general di salud y estilo di bida
Cada empleado lo ricibi feedback individual y guia personalisa. Si ta necesario, lo wordo recomenda pa evualacion mas profundo via docter di cas of otro proveedor medico. Tur informacion medico lo wordo trata cu confidencial stricto y conforme ley di privacidad.
Ademas di chekeonan individual, e colaboracion tambe ta habri porta pa:
- Grupo di apoyo pa condicionnan manera diabetes
- Educacion di salud segun necesidad identifica
- Presentacionnan di nutricion y vitalidad
- Guia practico pa un estilo di bida mas saludabel
Pero mas importante cu tur servicio medico, e programa aki ta representa un cambio di mentalidad: turismo cu ta pone nos hendenan central.
Den cuadro di e acuerdo, Buurtzorg Aruba tambe lo duna prioridad na huespednan di La Quinta si durante nan estadia tin necesidad di cuido di enfermeria. Esaki por inclui coordinacion di asistencia medico y ekipo special. E meta ta pa garantisa continuidad di cuido, comodidad y siguridad, mientras ta mantene e standard halto di hospitalidad.
Cu e iniciativa aki, La Quinta ta pone den practica un modelo di turismo unda cuido, respet y bienestar ta e base pa empleadonan y pa cada persona cu ta bishita nos isla.
