Durante Parada Grandi na Playa di Carnaval 72, Parlamentario Xiomara Maduro a haya un momento special pa gradici e artista Solio Sanchez miho conoci como Lord Lally pa su cantica, su perseverancia y e manera cu ela laga Aruba biba su cultura den Carnaval 72.
Lord Lally su storia ta uno special cu a toca curason y mente di hopi hende na Aruba y den exterior. Desde 1978 Lord Lally ta participa na e fiesta cultural mas grandi di Aruba cu su canticanan, pero nunca a logra cay den premiacion. Su participacion a haya un paro inespera, ora cu dos aña pasa Lord Lally a pasa den momentonan dificil cu su salud. Sinembargo durante su recuperacion, ta musica tabata dune e forza cu a mantene su spirito bibo.
Cu e mesun pasion di mas di cuater decada dedica na musica di Carnaval, Lord Lally ta bolbe participa den Carnaval 72 cu su banda Hot Ones y su cancion “The Lizard Kacking”. Apesar cu Lord Lally no a logra clasifica, e pueblo Arubano a lanta su bos. Pa medio di un votacion di “wild card” organisa pa Stichting Musica, Lord Lally a gana cu 7,463 voto y a pasa pa e final cu apoyo di Jeon, Steve Andreas y mas musico cu a aprecia e perseverancia di Lord Lally. Apoya pa Pueblo y husga pa huradonan, Lord Lally merecidamente a bay cu e corona di Soca Monarch 2026.
E historia di Lord Lally ta un testament di supervivencia, fe y comunidad. Un hende cu despues di adversidad a ricibi e bos y amor di su pueblo, a logra algo historico den Aruba su Carnaval. Aruba por sinti orguyoso, no solamente pa e musica cu a duna nos alegria, sino pa e curason cultural cu ta representa den cada nota cu a keda presenta.
“Lord Lally ta un ehempel di perseverancia. Su cantica a laga Carnaval y nos cultura biba den mente y curason di hopi, tanto na Aruba como den exterior, y esey ta un regalo cu nos tur mester aprecia. Lord Lally, pabien y danki pa e bunita regalo aki cu a laga Carnaval 72 luci aun mas,” ta palabranan di gratitud expresa pa Parlamentario Xiomara Maduro.
