Ta dificil pa bo biba felis huntu cu un hende cu bo ta pensa malo y papia malo di dje.
Hopi biaha mal pensamento ta bini di mal influencia diabolico, of mal experiencia di pasado cu keto bay bo no kier laga bay.
Si bo ta drenta un relacion nobo cu un persona , bo mester laga bay tur e cosnan bieu di bo otro relacion, pasobra asina un relacion tin duda of mal pensamento aden , cos no ta bay bon.
Pasobra for di curason ta sali pensamento malo, matamento . Adulterio,fornicacion,ladronisia,testimonio falso,calumnia. ( Mateo 15:19).
Ami Senjor ta scrudinja curason,Mi ta samina mente,pa duna cada un segun su conducta,segun e fruta di su hechonan.( Jeremias 17:9).
Pensa malo y papia malo, ta dos amigo malicioso, cu ta no ta respeta, y cu hopi biaha ta sinti placer pa ganja riba hende, basta nan tin algo di comenta.
Awendia hopi hende ta comenta algo malo di un persona, y ta bini dilanti un proverbio bieu, cu ta bisa, ora mi haci bon ningun hende ta corda, y ora mi haci malo ningun hende ta lubida.
Tin un trent mundialmente na moda di hendenan cu ta sinta pensa con susha siervonan di Dios, y con rebaha e evangelio, pa asina laga hende cay den decepcion y aparta for di e caminda di Dios.
Cada rato bo ta tende cosnan malo di lidernan spiritual y cosnan malo di iglesia, pasobra esey ta strategia di diabel pa tumba hende for di fe.
Palabra di Dios ta bisa hopi cla den Galationan 6: 1; Rumannan si un hende wordo sorprendi den cualkier delito , boso cu ta spiritual, restora un persona asina,den un spirito di mansedumbre, cada un wak su mes,pa boso tambe no wordo tenta.
E no ta bisa cu ora un hende haci fout pa nos bente abao di un forma cu e no por lanta mas, y hasta inventa mentira y papia algo di cual nos no sa, basta nos haci danjo.
No sea conforme e mundo aki, ma sea transforma, pa medio di renobamento di boso mente,pa boso por comproba,kico ta e bon y agradabel y perfecto boluntad di Dios.
E mundo aki ta destructivo, e mundo aki no tin misericordia, e mundo aki ta den gara di e malbado, y si nos ta apoya e cosnan di mundu, egoismo, envidia, malicia, y imoralidad, nos ta apoyando e enemigo den su trabao.
A bira na moda pa besbarata locual ta bon y apoya maldad, malicia, rabia, odio, griteria, esey ta e cosnan cu hende ta apoya awendia, y ora wordo papia di pas y amor ta parce manera nunca hende no a tende, cu bo tin di stima bo prohimo manera bo mes.
Hende ta parce manera nan no tin pasenshi mas pa resolve, restaura, y reconcilia, tur cos mester caba na malo y no ta importa ken sali cu perdida.
No haci nada,cu un actitud di egoismo,of orguyo,ma cu humildad laga cada un di boso, considera e otro mas importante cu e mes.No busca boso interes personal so,ma busca tambe interes di otro.(Filipensenan 2:3-4).
Bin yuinan scuchami y lo mi sinja bo e temor di Senjor,
Ta ken ta e hende cu ta desea bida y ta stima bida largo, pa e por mira bondad?.
Warda bo lenga di maldad y bo lepnan di papia enganjo. Aparta bo mes di maldad,y haci bon busca y siguie. ( Salmo 34:11-14)
Papia bon di hende ta un arte di amor,den cual nos ta demostra cuanto balor nos prohimo tin pa nos, pasobra e tambe ta yiu di Dios.
Sinceramente, Pastor Marcel Balootje
