Awe den Renaissance Convention Center a tuma luga un encuentro importante den marco di Dialogo Social entre Gobierno, gremio, sindicato y otro stakeholdernan relevante den nos comunidad. E reunion a wordo habri door di Prome Minister Mike Eman, hunto cu su coleganan Minister di gabinete, Minister Mervin Wyatt-Ras , Minister Geoffrey Wever y Minister Wendrick Cicilia.
Den su palabra di apertura, Premier Eman a enfatisa cu e intencion principal ta habri un proceso structura di dialogo, basa riba respet mutuo y participacion amplio. A remarca cu Aruba ta enfrenta diferente reto structural, incluyendo pensioen, salario minimo, cuido a largo plaso y sostenibilidad financiero.
Durante e reunion a trata seis punto riba agenda:
- Cambio di e Landsverordening Algemeen Pensioen (LAP)
- Aviso di SER riba ahuste gradual di salario minimo te na nivel di bestaansminimum
- Propuesta pa reglamentacion di Maatschappelijk Verlof
- Iniciativa pa regulacion di Langdurige Zorg
- Concept Landsverordening pa apoyo na muchanan cu necesidad di cuido intensivo
- Inventarisacion di otro tema pa futuro Dialogonan Social
A base di feedback ricibi di diferente organisacion, Prome Minister Mike Eman a propone pa, prome defini claramente e proseso, formato y prioridadnan di e Dialogo Social. P’esey el a sugeri forma un grupo representativo compone di delegado di werkgevers, werknemers y otro stakeholdernan, hunto cu Gobierno, cu lo traha un propuesta concreto riba e agenda y metodologia pa e siguiente fase.
Premier Eman a indica cu e dialogo pa awe ta keda den espera di continuacion a base di feedback cu e comision representativo, cu lo presenta cu sugerencianan riba e temanan di prioridad.
E reunion a marca un paso importante den fortalecimento di dialogo structural entre Gobierno y sector laboral, cu meta di construi consenso y sostenibilidad social pa Aruba.
