Durante IPKO, e tema di ‘vergrijzing’ a bin dilanti un biaha mas cu un supuesto caracter di urgencia. Remarcabel ta, cu e topico aki no solamente ta presenta como un estadistica, pero como un realidad structural pa tur e islanan den Reino. Parlamentario Eduard Pieters di fraccion di PPA a enfatisa: Aruba no ta enfrenta un problema inespera, nos ta enfrenta un problema cu nos sa di dje pa casi un decada caba, pero cu ainda no tin accion concreto.
Durante e presentacion na IPKO, sra. Helder a amplia e panorama cu cifra preocupante: na Aruba, casi 1 di cada 5 habitante ta 65+. Na Corsou, ta casi 1 di cada 4, esta 24% di populacion. E tendencia ta cla. E pregunta ta: con nos ta reacciona y actua awor?
Nos sa di problema for di 2018 — Pero unda e accion ta?
“Desde 2018, nos sa caba cu cuido di adulto mayor ta bay bira un carga financiero y organizacional enorme si no tin cambio structural. Casi 10 aña despues, nos ainda ta “analisa”, “prepara plan” y “evalua maneho”?”, Eduard ta puntra.
Segun Eduard: “E gastonan actual di cuido di adulto mayor ta core riba 100 miyon florin pa aña. E proyeccionnan ta mustra cu si nos no interveni structuralmente y promove cuido extramural, e cifra aki lo por yega te 400 miyon florin pa aña. Esaki no ta un aumento gradual. Ta un salto cu por bira impagabel pa un pais chikito manera Aruba”. Cada aña cu nos pospone decision, e gap financiero, logistica y social ta haci mas grandi.
E plannan t’ey pero sin implementacion
Den IPKO y den Parlamento, nos ta tende di “maneho futuro”, “cuido integra”, “transicion structural”. Pero fraccion di PPA ta pone e preguntanan cu te awe no tin contesta concreto. Ta trata di e preguntanan crucial:
- Unda ta e beleidsmedewerker cu ta traha riba implementacion real?
- Unda e plan di accion cu meta midibel ta?
- Cuanto placa exactamente e cambio structural ta costa?
- Cua ta e plazo di ehecucion?
“Den e ultimo reunion publico, fraccion di PPA a bolbe haci e preguntanan aki. E reunion no a sigui, paso minister no por a asisti. E asunto aki no ta politico. Ta structural. Ta demografico. Ta inevitabel.”
Ta di nos grandinan nos ta papiando di dje
“Vergrijzing no ta solamente cifra. Ta nos mama, nos tata, nos bisiña, nos maestro di antes.
Si nos no traha awor riba: cuido na cas, prevencion, sostenibilidad financiero, infrastructura adecuado y personal capacita. Nos ta laga un sistema colapsa pocopoco. Y ora colapso yega, e costo social y humano lo ta mucho mas halto, cu e costo di accion di awe,” Eduard a vocifera.
Fraccion di PPA no ta busca polemica, sino liderazgo. Vergrijzing ta un realidad cu no por wordo ignora ni romantisa. Aruba tin dato, estudio, maneho y presentacion suficiente pa por cuminsa actua.
Loke falta ta decision!
“Si nos no tuma accion structural awor, e problema lo no solamente crece, e lo domina nos presupuesto y nos capacidad di cuido cu dignidad pa nos grandinan. Aruba no por keda sin reacciona mas. Nos mester tuma vanguardia. Y e tempo pa haci esaki ta awor!” Eduard a finalisa bisando.
