Dialuna mainta den Corte, e abogadonan mr. Illes y mr. Carlo a defende e Polisnan M.V. y R.G.D.
SOLO DI PUEBLO por a compronde cu e abogadonan ta haya cu e dos Polisnan a actua corecto y no por castiga nan. Nan ta haya cu e comportacion di e victima Ayden a pone cu e Polisnan mester a actua.
E VICTIMA POR A EVITA TUR COS
Mr. Illes a bisa cu den e caso aki no conoce ganado sino perdedor den diferente grado. El a expresa palabranan di condolencia na mayornan y famia di e victima pa e lamentable sucedido. El a bisa cu tanto M.V. como R.G.D. ta bisa cu no tabata nan intension.
Segun mr. Illes, tur medaya tin dos banda. Polis ta esnan yama ora tin problema. Comunidad ta spera cu Polis ta percura pa orden. Pero loke no mester lubida ta, cu Polis tambe ta hende. Den e cayente di momento, nan tin algun seconde pa tuma decision y actua. Tin biaha e accion por ta no adecuado. E abogado ta haya cu mester respeta trabao di Polis. El a mustra cu henter e anochi di 9 Februari 2025, M.V. y R.G.D. a haci cantidad di controlnan y a mantene orden. E abogado ta hayua cu e persecusion e anochi ey, e victima por a evita cu tur cos ta escala. E victima a scoge pa huy. Door di e persecusion, e victima a crea un sospechoso contra su mes. El a mustra cu Polis a sende luznan, grita door microphone: “para, para”, pero no a duna resultado. Segun e abogado, e actitud di e victima a pone e agentenan crea sospecho. Pa minuutnan largo e persecusion a tuma lugar te den Madiki Kavel. Na opinion di mr. Illes, e agente M.V. a considera un menaza contra su bida ora e auto tabata subi velocidad riba dje y tirenan tabata yora. Hues a reacciona cu no tabatin velocidad halto. E abogado a bisa cu e motor tabata zona duro.
COMPORTACION SOSPECHOSO DI VICTIMA
Abogado mr. Carlo a bisa cu e agentenan a traha dobble shift y esaki a afecta nan. E dia ey a atende un caso di joyriding di un mucha di 14 aña cu a coy auto di su mayornan. Tabatin otro caso cu a para otro auto. Tabatin caso na Calibra caminda hasta tabatin tiramento. Tabatin problema grandi na hospital entre otro esnan di Calibra. Promer cu a bay Lekker Bar a topa cu e auto Toyota sin luznan patras cendi. A usa luz y microphone pa bisa e chofer di e auto pa para pero e victima no a haci caso.
E abogado a bisa Hues cu e intension di M.V. y R.G.D. tabata pa para chofer y atende riba su comportacion manera a haci na diferente caminda cu chofernan. Door cu Ayden a core bay, ta obligacion di Polis pa persigui y para e auto y detene e chofer. E Polisnan tabata sospechosa cu Ayden lo tabata bou influencia y por a pone trafico den peliger. Nan kier a investiga kico tabata e motibo cu Ayden a core bay apesar di indicacion di Polis pa para. Nan tabata informa Central di Polis di tur cos y hasta a pidi refuerzo. Mr. Carlo a remarca cu no ta berdad cu e Polisnan a haya orden pa stop e persecusion. El a bisa cu tin 7 agente di Polis cu a bisa cu Central a bisa pa para e persecusion si tin trafico den peliger. Na opinion di mr. Carlo, door di no a sigui indicacion di Polis pa para, e victima a escala e situacion.
E abogado a cuestiona raport di Landsrecherche cu no ta duna e ora exacto cu e promer y di dos tiro a cay. E abogado ta haya cu e luz di e patruya tabata duna indicacion cu lo a tira cual no ta asina. E ta haya cu e raport cu Fiscal a presenta di Landsrecherche, ta cuestiona mas e momento real di tiramento.
POLISNAN A TIRA PA SCAPA DI E AUTO
El a bisa cu loke nan por wak ta e tiramento di R.G.D. E abogado a bisa cu e momento cu e Toyota a bay riba M.V., e situacion a cambia di para pa detencion, den defensa contra e auto. Segun abogado, M.V. no a sali for di patruya cu pistol den man y dirigi arma riba e auto. Ta ora M.V. a mira e Toyota ta bin riba dje, el a saca pistol y tira. E momento ey R.G.D. a saca arma pa asisti M.V. Ora R.G.D. a tende un tiro, el a los tironan riba e auto pa scapa M.V. Nan intension tabata pa para e Toyota y no tirma mata Ayden. Segun abogado mr. Carlo, no tabatin otro forma pa para e persecusion aki. Door cu a manda auto riba Polis, esaki ta wordo considera un arma mortal. E abogado ta haya cu e Polisnan a actua pa scapa M.V. di e auto cu tabata bay riba dje. El a mustra riba un sentencia di un caso na Den Haag caminda Corte a haya cu Polis por a usa arma pa para auto. Segun mr. Carlo, M.V. no tabatin ningun oportunidad pa hala of bay bek den patruya. Den fraccion di seconde e auto tabata su dilanti. E abogado a mustra riba sentencia di Corte di Den Haag cu ta mustra cu Polis no mester huy di un menaza sino enfrenta e menaza. E abogado ta haya cu M.V. no tabatin otro manera cu tira riba e auto. R.G.D. a actua pa scapa M.V.
NO POR CASTIGA E POLISNAN
E abogado ta haya cu e Polisnan tabata autoriza pa a actua asina. E ta haya cu mester keda sin persigui e agentenan. Pa loke ta e demanda di daño, e abogado ta haya cu mester declara esaki no admisibel. Esaki, door cu no a argumenta nan suficiente. E ta mucho complica pa trata den un caso penal.
Hues a bisa cu dia 16 Maart 2026, e lo bay sera tratamento di e caso y e dia ey e lo bisa ki dia lo por spera sentencia. E Hues a bisa cu lo bay tin sentencia 2 April 2026.
