E peticion di Fiscal pa duna 12 luna di prison condicional na e dos agentenan di Polis, M.V. y R.G.D., kende ta sospechoso di a mata Ayden G.J. Lanoy durante un persecucion dia 9 di februari 2025, a causa un ola grandi di indignacion den comunidad Arubano.
Como reaccion for di pueblo, hopi hende ta bisa claramente cu nan no ta acepta e castigo pidi. Segun hopi opinion publica, e peticion di Fiscal ta wordo mira mas como un “libertad camufla” pa e dos polisnan, enbes di un castigo real cu ta refleha e gravedad di e caso.
“Esaki no ta husticia. Si un ciudadano comun a haci algo asina, e consecuencia lo tabata hopi mas duro,” varios persona a comenta.
“Ningun hende ta riba ley”… pero e pena ta conta otro cos
Durante e audiencia, Fiscal a declara cu “ningun hende ta riba ley, en especial esnan cu ta traha cu ley”, y cu e investigacion a wordo conduci di forma imparcial pa Landsrecherche, bao di supervision di Ministerio Publico.
Sinembargo, pa hopi ciudadano, e palabranan aki no ta cuadra cu e peticion final. Nan ta sinti cu e accion pidi no ta manda un mensahe fuerte ni preventivo, y cu e sistema ta faya den proteccion di bida humano, especialmente ora e acto a wordo cometi pa autoridad.
Famia y pueblo uni den dolor
Den sala di Corte, e presencia di famia di Ayden cu shirt preto y e mensahe “Justice for my son Ayden G.J. Lanoy” a toca hopi hende. Pafor di Corte y riba social media, pueblo a uni su vos cu e dolor y rabia di e famia.
“Ayden no ta bolbe mas, pero husticia por evita cu un otro mama pasa den esaki,” un miembro di comunidad a bisa.
Yamada pa husticia real
Comunidad ta pidi un reconsideracion serio di e castigo camufla cu ta libertad, y un señal cla cu abuso di poder no lo wordo tolera, sin importa ken comete e acto. Pa hopi Arubiano, e caso di Ayden Lanoy no ta solamente un caso penal, sino un prueba pa e integridad di e sistema di husticia.
Solo di Pueblo lo sigui monitorea e desaroyo di e caso y e vos di comunidad cu ta pidi: husticia, claridad y responsabilidad real.
