Un biaha mas nos ta presencia con e maquinaria berde ta intenta di ‘brainwash’ mente di pueblo, manipulando e historia real di Aruba. Cu hopi propaganda, palabranan grandi y storianan grandioso, nan ta haci un esfuerso constante pa crea un imagen pa Henny Eman.
Tur cos ta draai riba su vision, su lucha y loke el a logra. Pero ora un hende tin memoria, ora un hende ta lesa historia sin color politico, e pregunta ta bira simpel: unda exactamente e lucha ey ta? Unda e resultadonan concreto pa pueblo Arubano ta? Kico Henny a lucha pe ?
Esaki ta tipico di e mentalidad berde: denialismo. Un incapacidad pa acepta realidad y un falta di aceptacion pa e berdad. Un postura di “mal perdedor”. Pasobra, maske e ta duro, mester bisa: nunca nan por a acepta, ni kier a acepta, cu e unico homber cu a logra algo concreto pa Aruba tabata Betico Croes hunto cu su equipo di MEP.
E deseo y e carta formalisa na 1948, un grito di pueblo pa dignidad y autonomia, a wordo traiciona na 1949. E traicion aki a keda marca ora Henny Eman Sr. a bay di acuerdo pa forma gobierno cu Da Costa Gomez, caminda su yiu Shon A. a acepta un posicion di minister… pero sin funcion, sin trabou y sin poder real.
E tempo ey, nan a firma pa “bende” Aruba. Un acuerdo unda Corsou a haya 12 asiento, mientras Aruba a keda cu apenas 8; un bofetada den cara di e pueblo cu tabata lucha pa igualdad. Arubianonan a bay Curacao y a tira Henny cu webo putri.
Y despues? Sea ta Henny Sr., Shon A., Henny Jr. of Mike Eman: ningun di nan a lucha pa libera Aruba. Si nos ta honesto, nan a lucha, y ta sigi lucha, pa stroba, pa busca poder y pa proteha interes propio.
E celebracion di nos Dia di Himno y Bandera no ta un regalo di e maquinaria berde. Esaki ta e legado di Betico Croes. Un legado cu el a institui, cu el a defende y cu el a laga atras pa nos, e pueblo Arubano.
Historia no por wordo cambia cu propaganda. Memoria no por wordo elimina cu slogan. Aruba sa ken a lucha di berdad. Aruba sa ken a paga e prijs. Aruba no mester di ‘brainwash’, Aruba mester di e berdad.
