Desde e momento cu parlamentario Eduard Pieters di fraccion di PPA a huramenta, el a tuma un decision cla: no ban papia di salud mental for di distancia politico, pero sinta na mesa cu e profesionalnan cu ta traha tur dia den e veld aki y ban lora man y traha hunto. Salud mental no ta un topico secundario p’e. Pa Eduard Pieters esaki ta un compromiso personal y profesional, forma durante mas di su 20 aña den educacion y servicio publico. Pa prome biaha den su rol como parlamentario, el a cuminsa un rondo di consulta serio, cu enfasis special riba e parti specialisa di cuido di salud mental na Aruba.
Respaldo: Specialisacion y gap den sistema
Aña pasa, Pieters a bishita Fundacion Respaldo y a sinta cu director y miembro di directiva. E dialogo tabata profundo, concreto y sin filter. E informacion comparti a mustra tanto compromiso profesional como limitacion structural. For di e bishita ey, el a formula preguntanan crucial na minister en cuestion, tocante:
- capacidad di cuido specialisa
- continuidad di tratamento
- recurso humano
- y e gapnan cu tin den e cadena/sistema di atencion
Salud mental specialisa no por traha aisla. Si e sistema no ta conecta, e pashent ta cay den e gap.
Stichting Hunto: Cuido basico, prevencion y rehabilitacion
Diaranson Eduard Pieters a bishita Stichting Hunto, pa haya un panorama mas amplio riba GGZ basico. E ta gradici e fundacion y su directiva pa habri su portanan y comparti informacion transparente. E realidad cu a mustr’e ta impresionante y duro na mesun momento.
- Cuido Psico-social: na Dakota un team dinamico di profesionalnan ta brinda servicio psico-social na mucha, hoben y adulto. Practicamente nan tin un lista di espera di menos di 1 siman pa intake y 2 pa 3 luna pa haya ayudo psicologico.
- Inloophuis: un espacio unda e adictonan ambulante por drenta, descansa, combersa, come y haya un prome contacto humano sin prehuicio.
- Centro Colorado: un trayecto structural di rehabilitacion, cu programa completo di desintoxicacion, recuperacion y reintegracion social.
E sistema tin componente fuerte. Pero componente fuerte separa no ta sistema fuerte. “Bo ta ripara e pasion y amor pa nan trabou, sinembargo falta un miho cooperacion entre Respaldo y Stichting Hunto na beneficio di e pashentnan” Eduard a elabora. Tambe a compronde cu nan tin mester di mas profesional pa baha e lista di espera. Esaki ta contrario na loke Minister Wyatt-Ras a contesta parlamentario Pieters, esta cu no tin lista di espera den basis GGZ.
Ego no por ta mas grandi cu problema
“Den tur e bishitanan, un patronchi a bin dilanti: e profesionalnan tin pasion, pero e coordinacion mester mehora. Salud mental no por ta competencia entre e institucionnan. Ora un pashent ta move for di GGZ basico pa cuido specialisa, of for di rehabilitacion pa reintegracion, e transicion mester flui mas cu ta posibel, pa bienestar general di e pashent y henter bienestar di Aruba,”Eduard a expresa.
Pieters ta duna un mensahe directo: “Respaldo y Stichting Hunto mester por traha HUNTO, laga ego un banda y construi un modelo integra cu tur e profesionalnan necesario pa brinda e cuido di salud mental mihor cu ta posibel. No ta cuestion di protagonismo institucional. Aki ta cuestion di bida humano.”
Un sistema integral cu gobierno mester lidera
E rondo di consulta no a termina ainda. Tin mas partner den e veld cu Eduard Pieters ta pendiente pa bishita, pa forma un panorama completo, incluyendo e entidadnan no afilia directamente cu Respaldo of Stichting Hunto.
Meta final ta cla: exigi gobierno pa presenta un maneho integral y structural pa salud mental y adiccion. No un otro documento conceptual bunita, ni tampoco un proyecto piloto. Eduard ta exigi gobierno pa bin cu un plan cu ta contene cronograma, tin su metanan midibel, tin un presupuesto cla y structural y tin un coordinacion obligatorio.
Segun Eduard: “Pasobra cada caso cu ta cay door di deficiencia entre nos sistemanan, cada adicto ambulante cu no haya siguimento y cada hende cu ta fayece door di gapnan structural, ta uno di mas”.
“Salud mental no ta estadistica. Ta nos yiunan, nos famia, nos comunidad. Aruba no tin luho pa fragmentacion ni division institucional,”. Eduard Pieters ta sigui traha y ehecuta su rondanan di consulta tras consulta, pa construi un base serio di conocemento y despues exigi accion politico.
E momento pa uni ta awe, pasobra cada dia cu nos warda, e problema ta sigui crece. Y salud mental no ta un tema cu por warda mas.
