“Un lider cu ta papia di ‘Bon Comun’ pero ta permiti pa dumpnan ilegal opera sin permiso, no ta un lider responsabel. Sr. Mike Eman ta permitiendo un disaster den nos medio ambiente y ta birando complice di infraccionnan grave contra nos leynan,” asina e Parlamentario di MEP y experto huridico, Edgard Vrolijk, a declara.
Infraccion tras di infraccion
Vrolijk, conoci pa su conocemento profundo di nos leynan, a splica cu e falta di mando di e Minister actual ta bisto. “Pa opera un dump, bo mester di un Hindervergunning y un studio di impacto riba salud y medio ambiente. Awe nos ta mira dumpnan ilegal ta habri den tur bario sin ningun control. Door di haci di ciego, Mike Eman ta manda un mensahe hopi peligroso: cu na Aruba bo por kibra ley sin consecuencia.”
Segun Vrolijk, e daño no ta djis visual (sushi riba caminda), sino legal y ecologico. “Nos parha nacional, e Shoco, ta perdiendo su habitat pa motibo di e actividadnan ilegal aki. E mesun Minister cu mester proteha nos naturalesa ta esun cu ta permiti su destruccion. Esaki no ta vision, esaki ta un iresponsabilidad total.”
No tin handhaving
Edgard Vrolijk ta cuestiona dicon e departamento nan encarga, bou mando di Minister Eman y Minister Dowers, no ta actua. “E ciudadanonan ta bati alarma, Polis di Bario sa kico ta pasa, pero nada no ta pasa. Mi tin cu recorda e Ministernan aki cu unda derecho di un persona ta caba, esun di e bisiña ta cuminsa. Bo no por uza un tereno priva pa contamina un bario completo y afecta salud di nos muchanan y grandinan.”
Serlimar mester wordo fortifica
Mike Eman a hari e ‘tekenwedstrijd’ y awe e ta pio. Un Minister President cu ta drenta bario, planta mata pero tin e pais aki sushi mane nunca antes bisto. “Nos mester stop di yena Serlimar cu campañado y cuminsa uz’e pa loke e ta: e motor di nos limpieza y e autoridad cu ta controla infraccionnan. Nos mes por maneha nos sushi den un forma sostenibel, pero nos mester un Minister cu tin e curashi di aplica ley y ta duidelijk cu Mike Eman no tin.”
Reunion Publico
Fraccion di MEP no ta keda keto. Edgard Vrolijk a confirma cu lo pidi un reunion publico pa confronta Minister Mike Eman cu e realidad legal di su falta di maneho. “Pueblo a cansa di promesa di ‘tapa wowo’ tur diahuebs. Aruba merece un pais limpi, ordena y unda ley ta conta pa tur hende, sin excepcion.”
