Proverbionan 28:13 ta bisa lo siguiente: Esun cu sconde su picanan lo no prospera,ma esun cu confesa y laga nan lo hanja misericordia.
1 Juan 1:9 ta para scirbi : Si nos confesa nos picanan E ta fiel y husto pa pordona nos nos picanan y limpia nos di tur inhusticia.
Salmo 103:3-4 ta bisa lo siguiente: Kende ta pordona tur bo inikidadnan, Kende ta cura tur bo malesanan,Kende ta redimi bo bida for di destruccion, kende ta corona bo cu misericordia y compasion.
Dilanti di Dios no tin asunto di bida priva, pasobra ta para scirbi den Hebreonan 4:13: Y no tin ningun criatura scondi pa Su bista, ma tur cos ta habri y bisto dilanti di esun cu nos tin di haber cune.
Pasobra esun cu haci malo lo ricibi e consecuencianan di su maldad,cu e a haci,y esey sin distincion di persona.( Colosensenan 3:23).
E mayor cu sa cu su yiu ta haciendo malo y ta purba tapa cos pa e yiu, ta cooperando pa e destruccion di su propio yiu.
Ora un amigo of amiga ta sconde cos pa otro, nan dos ta bayendo atras, pasobra esun cu ta sconde su pica lo no prospera.
Pica ta contaminoso, una bes bo sa cu ta pica , bo mester aparta bo mes di dje, pasobra e lo hiba bo mas den scuridad, pasobra esey ta e plan di e enemigo, pa bo no sali, ma keda biba den pica.
Hopi biaha nos ta purba di coregi un persona, pero e kier defende su mes, y hasta bisa bo, pa wak bo mes, pa bo tira e prome piedra, y no husga su persona, mientras cu e sa bon bon, cu ta malicia e ta practica.
Keda biba hunto cu un persona, cu ta maltrata bo, verbal y fisico, sabiendo cu e persona aki su entrada ta di maldad, cosnan ilegal, ladronicia of benta di droga, djis pa bo hanja placa y luho, ta nifica cu bo ta sconde y defende pica. Y hopi no sa esey.
Si bo yiu haci algo robes awe, no pasa panja tibio riba dje,y bisa ta cos di mucha, pasobra mayan lo bo ta confronta cu malcriansa, otro siman cu bandido, y despues di tempo bo mes lo mester bay wak e den prison, pasobra como mayor bo no a sabi di coregi e mucha for di chiki.
Palabra di Dios ta bisa cu tur locual cu nos sembra nos lo cosecha, esey ta conta pa educacion di nos yuinan tambe, mas nos coregi y disiplina mas integridad nos yiu lo lanta cune.
Si nos permiti bagamunderia nos lo cosecha desaster, nos lo tin un yiu, cu nos no por bise nada, pasobra e lo no tende, pasobra nunca nos a instrui e mucha den caminda di coreccion, locual bo no a pone atencion na chikito of neglisha, na grandi e ta bira dificil pa controla.
Ami Senjor ta scrudinja curason y Mi ta samina mente,pa duna cada un segun su conducta, segun e fruta di su hechonan.
Ningun hende no ta pasa riba Dios, pasobra Dios ta Todopoderoso, palabra di Dios ta bisa cu hende lo wordo husga pa nan conducta, y di esey ningun hende por scapa, pero si un persona, arepenti, y entrega su bida na Dios y aparta for di pica, Dios ta fiel y husto di pordona.
Dios semper ta pordona, ora nos arepenti, pero e consecuencia di nos pica, esey ta locual ta doloroso.( 2 Samuel 12:13-19).
E wowonan di Senjor ta tur caminda vigilando malo y bon ( Proverbionan 15:3).
Dios tene misericordia.
Sinceramente,Pastor Marcel Balootje
