Diadomingo maruga den careda di 3’or y mey polis mester a bay cu urgencia rotonde di Bushiri, pa un accidente di brommer.
Polis a yega y a topa cu un brommer Harley Davidson basta grandi benta abou, banda di dje algun persona rond di e motociclista cu tawata seriamente herida.
Riba caminda por a mira un rastro di brake. Posiblemente momento cu e motociclista kier a reacciona ya tawata laat y ta dal cu hopi forsa contra e beton cu ta rond di e structura.
Mirando e situacion di e cabayero a pidi ambulance cu urgencia. Paramediconan na yegada a actua mesora y a lanta e victima pa sali direccion Hospitaal cu ne.
Departamentonan concerni a ser poni na altura di e sucedido serio aki.
