Parlamentario Jennifer Arends-Reyes ta propone e introduccion di un sistema digital moderno pa registra presencia di muchanan na centronan di cuido riba nos isla. E proposicion aki tin como meta fortalece supervision, siguridad y comunicacion entre centro di cuido y mayor.
Segun Arends-Reyes, e sistema actual, den hopi caso, ainda ta depende riba lista di papel y registro manual. “Den un tempo unda tecnologia ta avanza asina rapido, nos mester move cu e temponan. Un app digital pa presencia lo duna mas transparencia, eficiencia y siguridad pa nos muchanan,” Sra Arends-Reyes a declara.
E app lo permiti:
• Registro directo ora un mucha yega y ora e bay cas.
• Notificacion automatico pa mayor via mensahe of push notification.
• Un sistema sigur cu ta warda informacion di forma confidencial.
• Un panorama cla di presencia pa directiva y autoridad competente.
Arends-Reyes a enfatisa cu siguridad di mucha mester ta prioridad number un. “Mayor tin derecho di sa cu nan yiu ta bon y cu nan a yega centro di cuido sin problema. Cu un sistema digital, nos por purba evita confusion, error humano y situacionnan innecesario.”
Ademas, e parlamentario a indica cu e propuesta ta alinia cu e vision di modernisacion di sector social y educativo na Aruba. Digitalisacion no solamente ta mehora proceso administrativo, pero tambe ta contribui na un cultura di responsabilidad y transparencia.
E iniciativa lo por sali di sector priva of wak kico tin disponibel caba style di “Procare Childcare” app lo por consulta cu Ministerio di Enseñansa asina cu directiva di diferente centro di cuido, pa evalua factibilidad, costo y proteccion di dato personal conforme legislacion vigente.
“Nos mester inverti den solucionnan inteligente cu ta pone bienestar di nos muchanan prome. Si nos por uza tecnologia pa facilita bida di mayor y personal di cuido, nos mester haci esey,” Arends-Reyes a conclui. Cu e propuesta aki, Parlamentario Jennifer Arends-Reyes ta reafirma su compromiso cu innovacion, proteccion di mucha y fortalecemento di calidad di cuidonan na Aruba.
