Tin hopi cos ta pasando rond mundo , y hopi hende ta puntra ta dicon. Cada dictadura cu nos mira ta cay serca di nos of leu for di nos ta Dios, ta tumbando dictadura, opresion y tirania, pasobra Dios ta odia e sistema di goberna pais asina ey.
Tur dictadura ta maltrata, abusa y mata hende cu no kier haci manera nan kier, den tur pais caminda tin dictadura tin cantidad di preso politico, caminda tin dictadura un grupito ta biba bon, y mayoria di e pueblo ta sufri.
Caminda tin dictadura tin bruheria y adoracion di Dios falso, pasobra dictadornan ta kere den proteccion di diabel, caba diabel no por proteha ni su mes contra e poder di Dios.
Caminda tin dictadura forsa militar ta manda of grupo nan paramilitar ta presiona hende.
Y nan ta derama sanger inocente locual ta contra boluntad di Dios. ( Proverbionan 6:16).
Den testament bieu tabatin hopi dictador y nan tabata hiba e pueblo den adoracion di Dios falso, manera algun di nan cu ta conoci , Ahab y su casa Jezabel, y nos tur a mira con nan a termina. Dios mes ta lanta e hendenan pa caba cu nan, pasobra a derama demasiado sanger inocente.
Tur dictador tin un fin malo, tin hende ta apoya dictadura, pasobra nan ta ricibi placa for di nan, pesey nan ta apoyanan. Y den tur dictadura tin vengansa politico.
Mayoria pais caminda tin dictadura, hende no ta hanja chens pa sirbi Dios abiertamente, especialmente den paisnan comunista caminda Bijbel no tin entrada.
Nos tin cu tene cuenta tambe cu den ningun cas, Dios no a duna e homber cu ta cabes di cas autoridad pa dicta, pero Dios a manda e homber pa stima su esposa, manera Cristo a stima su iglesia.y dirigi su cas den e amor di Cristo Hesus.
Ningun hende no tin derechi di dicta riba otro, ni tampoci oprimi otro, pero Dios a duna homber y muher derechi pa biba liber y stima otro, casa cu otro, y multiplica y yena e mundo.
Den Daniel 2:21-22 ta para scirbi:
Y ta E ta esun cu cambia, tempo y epoca.
E ta kita reinan y pone reinan.
E ta duna sabiduria na sabionan.
Y conocemento na hombernan di comprendemento.
E husto ta wordo libra for di tribulacion,ma e malbado ta tuma su lugar.( Proverbionan 11:8).
E malbado ta wordo trastorna y no tey mas, ma cas di e hustunan lo permanece.( Proverbionan 12:7).
Ora cu e hustonan aumenta , pueblo ta regosiha, ma ora un malbado ta goberna, pueblo ta suspira.(Proverbionan 29:2).
Tur caminda Dios ta haci huicio y husticia, tur caminda Dios kier pas y trankilidad, pero e enganjo di diabel, ta pone hende bira envidioso y golos pa placa, nan kier poder, nan kier domina, y e enemigo ta usa nan pa haci esey, pesey tin tanto dictadura riba mundo.
Pasobra cada dictador ta influencia pa e malbado, kende ta dirigi nan mente y nan curason, pesey tin tanto maldad asina pasobra e ladron a bini solamente pa horta pa mata y pa destrui, y su bista ta riba mandatarionan cu ta pratica dictadura, pa asina e por drenta den e pueblo cu tur sorto di maldad, y malicia , matamento, tortura,bruheria, y genocidio.
Dios a yama nos pa lus, pa nos lusa tur caminda, y corre cu scuridad, pasobra esun cu ta cana cu Dios ta cana den lus, dictadura ta scuridad, y no tin ningun benficio pa e pueblo.
Dios ta tumbando dictador, rond mundo pa demostra Su Soberania y poder riba nan.
Sinceramente, Pastor Marcel Balootje
