Haci tur cos sin murmura ni discuti,pa boso por proba boso mes, di ta sin culpa,y inocente, yuinan di di Dios sin reproche, meymey di un generacion corumpi y perverso,entre cual boso ta briya manera lusnan den mundo.Teniendo duro na e palabra di bida,pa den e dia di Cristo, mi por tin motibo pa gloria, pasobra mi no a corre en vano, ni a traha en vano.( Filipensenan 2 :14-16).
Ora nos no murmura, nos ta demostra di ta yuinan di Dios, agradecido, cu ta stima Dios, y ta aprecia locual Dios a haci pa nos, y locual E ta bay haci pa nos.
Pero ora nos ta murmura sea temporal of constantemente, nos ta demostra di no ta aprecia e bendicion cu Dios ta pone riba nos bida , ni tampoco kere den e bondad cu ta bini for di su man, y asina di un forma crioyo bisa: Nos ta come y lubida.
Y no murmura manera algun di nan a haci, y a wordo destrui door di e destruidor. ( 1 Corintionan 10:10)
Numbernan 14:26-27 ta para scirbi: Y Senjor a papia cu Moises bisando: te ki dia Mi tin cu soporta e congreacion malbaldo aki,cu ta murumura contra Mi.Mi a tende e murmuracion,cu e yuinan di Israel ta murmura contra Mi.
Dios keto bay ta tende tur cos cu nos ta papia y ta mira tur locual cu nos ta haci, y tin cosnan cu berdaderamente, nos no tin di haci wega cune, pasobra den bista di Dios nan ta cosnan hopi serio, djis un tiki murmiracion por cambia henter un buelta den un hogar y trece tardansa den cosnan cu mester wordo haci.
Pa motibo di mumuracion, cosnan ta tranca, pasobra Dios no kier pa hende murmura, ni tampoco keha, laga nos haci oracion den tur momento y duna danki na Dios, pa Su misericordia.
Riba tur cos keda ferviente den boso amor pa otro,pasobra amor ta cubri un multitud di pica. Duna posada na otro sin murmura,Como cu cada un a ricibi un don special,use pa sirbi otro,como bon mayordomo di e gracia multiforme di Dios.( 1 Pedro 4;8-9-10).
E Spirito di Dios no tey caminda tin murmuracion, pasobra murmuracion ta kibra nos contacto cu Dios, pesey e palabra ta bisa pa haci tur cos, pero tur cos sin murmuracion, ta tempo pa saca murmuracion for di curason y boca y cuminsa demostra gratitud, na Dios.
No descalifica ningun hende su trabao, pa asina busca crecemento of lanta calumnia, pero den tur cos, laga nos ta agradecido na Dios tur momento, laga nos sinja nos yuinan pa nan ta agradecido na Dios, teniendo cuenta den e tempo trabahoso cu nos ta bibando aden cu maldad ta aumenta tur dia, y hende ta aleha for di Dios y awor ta murmura mas cu nunca.
No keha un contra otro rumannan, pa boso mes no wordo husga,ata E Hues ta para na porta.( Santiago 5:9).
Esun cu no ta carga su crus y bin mi tras no por ta mi disipel. ( Lucas 14:27).
Den bida nos tur ta pasa door di prueba pa nos crecemento, prueba cu ta demostra con grandi nos amor y fieldad ta pa Dios.
Cada ken Dios tin su forma pa trata cune, pero den tur caso nos tin cu bandona e caminda nan di mundo, y drenta bao di e sombra di e Todopoderoso, caminda Dios su proteccion tey pa nos tur y caminda nos no ta murmura.
Mumuracion no ta na bienestar di ningun hende, ningun famia, den ningun hogar.
Laga nos expresa gratitud y alaba Dios, tur momento.
Sinceramente, Pastor Marcel Balootje
