Aruba ta prepara pa celebra 40 aña di Status Aparte y 50 aña di nos Himno y Bandera, pero den curason di e celebracion aki tin un amargura politico. Con Mike Eman y Gerlien Croes por para cu orguyo dilanti nos simbolonan nacional, ora nan mesun Gabinete ta esun cu a primi e boton pa entrega Aruba na Hulanda door di e Rijkswet HOFA?
Palabra bunita, accionnan scur
Informacionnan recien ta mustra cu Gabinete AVP FUTURO a scoge pa ignora e vos di pueblo. Maske mas di 10,000 firma a wordo colecta contra e Rijkswet HOFA y maske casi mitar di Parlamento no a duna e ley aki nan apoyo, e coalicion AVP-FUTURO a dicidi di forsa e ley aki y mand’e pa Raad van State na Hulanda.
Status Aparte vs. HOFA
E celebracion di e aña aki mester tabata un momento pa reafirma nos autonomia. Sinembargo, e decision di e gobierno actual pa duna Hulanda e poder di decision riba nos finansanan publico a wordo califica pa hopi como un “bofta” pa e lucha di Betico.
Mike Eman ta presenta su mes como e guardian di e herencia di AVP, pero ta permiti pa su gobierno debilita e mesun Status Aparte cu su famia tabata pidi p’e.
Gerlien Croes ta wordo señala como e motor tras di e entrega aki, pushando pa un ley di consensus cu, segun criticonan, no tin e berdadero consensus di pueblo ni di e trahadonan representa pa e sindicatonan.
Celebracion of Give Up ?
Pueblo di Aruba tin mester di claridad. Bo no por celebra autonomia cu un man, mientras cu e otro man bo ta firma leynan di Reino cu ta ranca poder for di nos propio Parlamento. E wega di “laba man” y culpa otronan pa loke a cuminsa den pasado no ta funciona mas: e decision final pa duna bida na HOFA awor na maart 2026 ta carga un solo firma, y esey ta di e coalicion AVP-FUTURO.
Si Mike Eman y Gerlien Croes kier celebra Status Aparte cu sinceridad, nan tin cu splica pueblo pakico nan a scoge pa entrega e autonomia financiero na Den Haag na un momento asina crucial den nos historia.
