Recientemente, algun ciudadano a expresa den rednan social cu mester “culpa tur politico di e ultimo 40 añanan” pa e situacion actual y cu mester laga e “macambanan” (Hulanda) tuma decision pa nos, pasobra al fin y al cabo “nos tur ta Hulandes”. Maske e frustracion riba e maneho financiero di pasado ta comprendibel, e tipo di pensamento aki ta peligroso y ta ignora e nificacion profundo di nos Status Aparte.
E fayo den e comparacion di “negoshi”
Hopi biaha ta uza e ehempel cu si bo ruman ta maneha bo negoshi den cora, bo mester kit’e y duna e yabi na un otro. Pero tin un diferencia grandi: Aruba no ta un negoshi, Aruba ta un Pais. Ora bo entrega e yabi di bo pais na un otro (den e caso aki Hulanda via e Rijkswet HOFA), bo no ta simplemente “drecha e finansas”. Bo ta entrega e derecho di bo yuinan pa dicidi riba nan mesun futuro. Si un ruman ta maneha bo negoshi malo, bo ta cambia e ruman (e politico), bo no ta regala e negoshi na e bisiña! Den democracia, e solucion ta den e voto consciente, no den saca man pidi pa un “curatela” colonial.
Passport vs. Nacionalidad
Un argumento cu hopi biaha ta wordo uza ta cu nos nacionalidad ta “Nederlander” y cu nos ta biaha cu un passport cora. Esaki ta berdad legalmente, pero den Reino Hulandes, nacionalidad no ta mesun cos cu autonomia politico.
E passport ta duna bo e derecho di biaha.
Status Aparte ta duna bo e derecho di goberna bo mesun isla.
Esnan cu ta bisa “laga e macamba dicidi” ta lubida cu na Den Haag nan no sa kico ta e necesidadnan di un bario na Santa Cruz of San Nicolas. Nan ta mira number, nan no ta mira hende. Entrega autonomia pa motibo di un passport ta mesun cos cu bende bo cas pasobra bo tin un carchi di banco di un otro pais.
Ken ta culpabel?
Culpa “tur” cu a goberna pa 40 aña ta un manera facil pa evita di mira e realidad di awe. Na 2009 Nel a laga e debe di pais na 40% di GDP. Mike na 2017 a subi’e te na 110% di GDP. Evelyn a bahe y lage na 70% di GDP. Esey ta e mensahe cu nos mes por. No mester di Hulandes pa dicidi pa nos.
Nos no por keda biba den pasado pa hustifica un futuro unda nos Parlamento no tin nada di bisa mas. Un pais cu ta respeta su mes ta drecha su mesun cas, cu su mesun hendenan, sin mester bende su dignidad pa un “interes mas abou” riba un debe.
