Rebeldia contra Dios, of mihor bisa contra e palabra di Dios ta algo hopi serio, tin biaha hende ta haci manera nan no ta haci nada, pero nan sa masha bon cu nan ta rebelde, pero toch nan no kier cambia e conducta.
Ora hende ta rebelde ta nifica cu nan no kier respeta Dios, aunke nan ta na altura cu Dios ta riba tur cos, toch nan ta sigi pretende cu nan capricho of cu nan curason cu no kier arepenti.
Bo ta papia cu un hende rebelde tocante su conducta, e ta bisa bo pa no husgami,pero locual bo kier avisa e persona ta cu no ta abo, pero e palabra di Dios, ta bisa pa cambia e actitud sino e huicio di Dios ta bini riba dje.
Hopi ta prefera bisa bo wak bo mes, y cu tur otro forma di defensa bobo, pero asina e diabel ta wanta nan den scuridad di rebeldia, cual simplemente ta hiba na destruccion.
Un hende mester ripara cu e tin dos pia , pero e no por cana den dos caminda, e no por come for di dos tayo, no tampoco sinta nan dos mesa, Dios hopi biaha ta purba hala hende su atencion, pero nan ta rechasa e palabra di Dios, cu ta bisa pa arepenti, y aparta for di scuridad, malicia y inmoralidad, bandona caya y tur su trikinan, y ta keda persisti cu ta eynan ta e mihor lugar.
Anto nan no ta tene cuenta cu rebeldia ta aparta nan for di Dios, nan ta lubida cu nan curpa ta tempel di Dios y cu e Spirito di Dios ta biba den nan.
Dios tin hopi forma pa trata cu hende rebelde, e ta pasa nan den prueba, pa nan por ripara cu e caminda cual nan ta riba dje ta robes, y tambe hopi biaha e ta hiba nan cama di malesa ( Revelacion 2:22), pero nan ta sigi persisti, y no lubida cu hende por pone Dios rabia cu nan comportacion, y cu nan hacimento di bofon di e palabra di Dios, y nan lo cosecha locual nan ta sembra.( Galationan 6:7-8).
Tin hopi ta biba den un filosofia, cu Dios no ta rabia, y cu Dios ta amor solamente, pero nan no ta wak kico tin para scirbi bon cla den e buki di Romanonan 2:5-11 caminda e palabra di Dios ta pone bon cla kico hende por sembra pa nan mes ora nan ta rebelde.
Mescos cu e palabra di Dios ta mustra bon cla kico hende ta hinca nan curpa aden den Romanonan 1:28-32 ora nan no kier reconoce Dios, y e consecuencia cu tin pa nan bida, si nan no arepenti,y aparta pasobra e palabra di Dios ta: Si nos confesa nos picanan e ta fiel y husto pa pordona nos , nos picanan y libra nos di tur inhusticia, esey ta nifica cu tur, pero tur hende, ta hanja e oportunidad pa confesa, arepenti y aparta for di pica, y tuma Dios na serio, y laga e pas y amor di Cristo Hesus goberna den bo bida . (Colosensenan 3:15).
Ma nan a rebeldia y haci Su Spirito Santo tristo, pesey pa nan e cambia bira nan enemigo, E a bringa cu nan. ( Isaias 63:10).
Si boso ta dispuesto y ta obedece, boso lo come e mihor di e tera,, ma si boso nenga y rebeldia, spada lo devora boso,Di berdad e boca di Senjor a papia.( Isaias 1:19).
Dios ta mesun Dios di ayera, awe y pa semper, no tin Dios moderno tampoco su palabra ta cambia.
Sinceramente, Pastor Marcel Balootje
