Diabierna Fiscal a exigi 6 aña di prison pa e rumannan J.L. y D.L. Fiscal ta haya nan culpabel di a purba mata Zuriel Celaire y posecion di arma di candela. E abogadonan a cuestiona e investigacion y ta haya cu mester declara J.L. y D.L. liber.
SOLO DI PUEBLO por a compronde cu abogadonan mr. Arends Marchena y mr. Kuster ta haya cu no tin prueba cu e rumannan J.L. y D.L. a tira riba e auto cu Zuriel Celaire tabata core. Nan ta haya cu mester declara J.L. y D.L. liber.
ABOGADONAN TA CUESTIONA INVESTIGACION
Diabierna despues di e exigencia di Fiscal di 6 aña di prison pa e rumannan J.L. y D.L., e abogadonan a hiba nan defensa. E abogado mr. Arends Marchena a bisa Hues cu no por papia di intento di asesinato y tampoco intento di mata contra su cliente J.L. E abogado ta haya cu no tin prueba cu J.L. ta envolvi den e tiramento. Na opinion di mr. Arends Marchena, no tin ningun indicacion cu J.L. lo a tira. E abogado ta haya cu e bala cu a haya den asiento di e auto y e huls di bala no tin relacion cu J.L.
E abogado a mustra cu Celaire tin problema y riba e dia ey hasta e tabata arma. Celaire lo a bisa Polis cu den pasado, el a tira riba un grupo den San Nicolas y cu J.L. lo ta forma parti di e grupo aki. E abogado ta haya cu esaki no tin nada di haci cu e tiramento riba Celaire. E abogado a mustra cu na April 2025, Celaire a maltrata y pone arma na cabez di D.L.
El a sigui bisa cu den e mensahenan cu Celaire a manda ta mustra cu e mes ta bay regla asunto riba caya. E abogado a bisa Hues cu no tin ningun fingerprint cu ta munstra cu J.L. lo por a tira. E abogado ta haya cu e investigacion no ta completo. Mr. Arends Marchena ta haya irresponsabel cu Fiscal ta exigi 6 aña di prison pa J.L. sin cu tin indicacion concreto.
Abogado mr. Kuster a bisa Hues cu aki ta trata di un “drive by shooting” caminda tanto Zuriel Celaire como e sospechosonan ta conoci di Polis. E abogado a cuestiona imagennan di video cu Polis ta usa como prueba. Na opinion di e abogado, e imagennan no ta duna imagen cla cu ta e mesun auto lo tabata core tur e ruta tras di e auto di Celaire. E abogado ta haya cu e raport di Recherche no ta cuadra cu loke e imagennan ta mustra.
E abogado a cuestiona tambe cu e video di seguridad cu ta mustra riba e cas unda J.L. y D.L. a bay, solamente algun parti a usa como prueba y no tur e imagennan. El a mustra tambe cu tin diferencia di hopi minuut den e imagennan cu no ta duna un bista cla kico tur a sosode na e cas di e rumannan L.
E abogado a conclui cu no tin prueba cu D.L. lo ta envolvi den e drive by shooting. E abogado ta haya cu mester declara D.L. liber.
Na final di tratamento di e caso, J.L. a remarca na Hues cu e no a tende nada di e menazanan cu Zuriel Celaire a haci contra dje y su famia. D.L., na su turno, a bisa Hues cu e tambe a haya menazanan.
Hues a sera tratamento di e caso y a bisa cu e ta bay studia e caso. Dia 2 April 2026 e lo tuma un decision.
