Parlamentario di MEP, Xiomara Maduro, a presenta un charla riba e historia y significado di Status Aparte na Cede di Movimiento Electoral di Pueblo (MEP), den marco di conmemoracion di e celebracion di 40 aña di Status Aparte.
Durante su presentacion, Maduro a guia e audiencia pa medio di e diferente momentonan clave cu a marca caminda di Aruba pa logra su Status Aparte. E charla a mustra con e movimiento pa separacion di Antias Hulandes tin su raiz den e prome peticionnan pa mas autonomia, incluyendo e accionnan politico y social na 1933 y e gran manifestacion di 1947, unda miles di Arubiano a expresa nan deseo pa separacion.
Maduro a destaca tambe e rol central di Betico Croes, kende a drenta politica na 1967 y posteriormente a funda MEP na 1971. Segun Maduro, e partido a naci cu e meta di lucha pa un Aruba mas husto, uni y orguyoso di su identidad, basa riba idealnan di husticia social, amor pa Aruba, unidad di pueblo y autonomia.
Entre e eventonan historico menciona durante e charla tabata e manifestacion masivo di 18 di maart 1973 na Wilhelmina stadion, unda miles di Arubiano a reuni pa expresa nan deseo pa un status autonomo den Reino Hulandes.
E lucha pa autodeterminacion a sigui crece den decada di 1970. Maduro a recorda e Marcha di Libertad, tambe conoci como Marcha di Flambeu, di 18 di maart 1975, cu a simbolisa e determinacion di pueblo pa logra su libertad politico.
Un momento clave den e proceso tabata e referendum di 25 di maart 1977, unda 82% di votante a pronuncia nan mes na fabor di separacion di Antias Hulandes. E resultado a duna Aruba un mandato democratico fuerte pa sigui negocia cu Hulanda riba realisacion di Status Aparte.
E parlamentario a menciona tambe e periodo di protesta y mobilisacion social conoci como “Augustus Scur” na 1977, na unda pueblo Arubiano a expresa su frustracion despues cu MEP a gana eleccion di Staten pero no a logra forma gobierno. E protestanan y welga general di e periodo ey a contribui pa forza Hulanda habri dialogo riba futuro politico di Aruba.
Durante e charla tambe a wordo destaca con Betico Croes a duna 18 di maart un dimension nobo. Na 1976 e fecha a wordo escogi pa honra lidernan historico manera Juancho Yrausquin, Henny Eman y Shon A. Eman. E mes aña Aruba a adopta simbolonan importante di su identidad nacional, incluyendo su Himno y Bandera na 18 di maart.
Maduro a repasa tambe e proceso diplomatico y negociacion cu a sigui despues di 1977, cu delegacionnan Arubiano participando den diferente comicion y conferencia internacional. E proceso a culmina na Conferencia di Mesa Rondo di 12 di maart 1983, unda Hulanda a reconoce e derecho di autodeterminacion di Aruba. E acuerdo ey finalmente a conduci na introduccion di Status Aparte na 1 di januari 1986.
Despues di e presentacion, e actividad a sigui cu un combersacion cu Nel Oduber, lider honorario di MEP y ex-Prome Minister di Aruba. Durante e dialogo, Oduber a comparti recuerdonan personal di e lucha politico pa Status Aparte y a ofrece contexto adicional riba e decisionnan cu a marca e periodo historico ey.
Oduber a conecta e historia di e lucha pa autonomia cu e discusionnan actual riba Rijkswet HOFA, indicando cu e tema di autonomia, gobernacion y responsabilidad dentro di Reino Hulandes ta sigui relevante pa Aruba te awe.
Segun e lider honorario, compronde e historia di Status Aparte ta fundamental pa por interpreta e debate actual riba futuro politico y financiero di pais.
E charla a finalisa cu un reflexion riba importancia di identidad nacional, unidad di pueblo y compromiso politico pa proteha e logronan di autonomia cu Aruba a conkista despues di decenas largo di lucha.
