Dialuna mainta Corte di Husticia a trata e caso penal cu Ministerio Publico a cuminsa contra e homber Arubiano E.A. (46) y e homber Colombiano biba na Aruba, J.S.O. (33), kendenan ta wordo sospecha di importacion di un lote miyonario di droga.
SOLO DI PUEBLO por a compronde cu Fiscal a haya E.A. y J.S.O. culpabel di complice di importacion di 370 kilo di marihuana y 335 kilo di cocaina. El a exigi 10 aña di prison pa E.A. y 9 aña di prison pa J.S.O.
BOTO CU LOTE GRANDI DI DROGA NA EAGLE BEACH
E acusacionnan cu Fiscal a presenta contra E.A. y J.S.O. ta cu riba 8 Juni 2024 nan ta complice di importacion di lote grandi di marihuana y cocaina y tambe 3 revolver. Ademas Fiscal a mustra cu tin acusacion contra E.A. pa exporta cocaina na October 2024 y contra J.S.O. tin acusacion di posecion di mey bloki di cocaina y a maltra su ex pareha. Hues a puntra E.A. y J.S.O. kico nan tin di bisa di e acusacionnan. Tanto E.A. como J.S.O. a bisa cu nan no tin nada di haci cu e caso di lote di droga. Hues a mustra cu segun e relato di Polis, dia 8 Juni 2024 den oranan tempran di mains, Guarda Costa a intercepta un boto na Eagle Beach. Dos persona a wordo deteni mientras cu dos a logra huy. Riba e boto a confisca mas di 700 paki di droga. En total a confisca 379 Kilo di marihuana, 335 Kilo di cocaina y 3 revolver. Durante e accion a mira cu un Mitsubishi Montero a core bay.
BOTO INTERCEPTA TA DI UN SOSPECHOSO
Un investigacion grandi a tuma lugar caminda Inteligencia di Polis a bin haya sa cu e Mitsubishi tabata na un cas den Gielstraat. Polis a bay na e cas y a papia cu e dama cu ta biba na e cas. Tambe Polis a pidi e cameranan di seguridad den vecindario pa mira e movecionnan cu a tuma lugar. Riba camera a mira cu e boto cual Guarda Costa a intercepta, tabata para den cura di e cas na Gielstraat. E doño di e cas a bisa cu e boto ta di E.A., kende a pidi e tanta pa para e boto eynan y Diahuebs 8 Juni 2024 el a busca e boto cu un Mitsubishi Montero. Ora Hues a confronta E.A. cu e informacionnan aki, E.A. a bisa cu e ta haci uso di su derecho di silencio. El a bisa Hues cu el a bisa tur cos caba na Polis. Hues a sigui bisa cu e dama di e cas a bisa cu e boto tabata para den cura pa basta tempo. Na dado momento, algun hende Spaño a bay drecha e boto y pone motor y Diahuebs E.A. a busca e boto. Tabatin imagennan di cameranan di seguridad den vecindario caminda 5 Juni 2024 ta mira e boto para y ta mira J.S.O. cu otro 2 hende homber a bay instala motornan riba e boto. J.S.O. a admiti na Hues cu e tabata eynan y cu ta nan a pidi’e pa yuda instala e motornan. Ta asina cu por a mira cu E.A. tambe tabata tey y e tabata mira con e motornan a wordo instala riba e boto. E.A. a bisa Hues cu el a bay pa mira kico nan tabata haci na e boto. Dia 6 Juni 2024 a mira un auto a yega para na e cas y dos homber a baha y hiba cahanan na e boto. Parce cu nan tabata prepara e boto pa navega. A mira e homber M. y J.S.O. pone barinan blauw den e boto. Despues e Mitsubishi Montero a bay busca e boto y a bah’e na laman. Despues e Mitsubishi Montero a trece e trailer di e boto bek. Hues a puntra J.S.O. kico e tabata haci na e cas. Segun J.S.O., e homber M. a pidi’e pa yuda pone cosnan den e boto.
DOS CONDENA CABA PA LOTE DI DROGA
Hues a puntra tanto E.A. como J.S.O. si nan conoce e hombernan I. y M. Ambos a bisa cu nan no conoce e dos hombernan. Hues a mustra cu I. y M. cu a wordo gara door di Guarda Costa na e boto y nan a wordo condena na 7 aña di prison.
MIRA AUTO HIBA BOTO EAGLE BEACH
Hues a mustra cu 6 Juni 2024 pa mas o menos 5.55 di mainta, Polis ta mira riba video di seguridad, e boto tabata wordo lastra pa un Mitsubishi Montero na e rotondo Tortuga na Eagle Beach y a laga e boto na e beach.
Dia 8 Juni 2024 mainta trempan, na e mesun retonde, ta mira e Mitsubishi Montero ta pasa cu e trailer di boto y un auto Toyota. E Toyota tabata keda core rond di e rotondo. Polis a sospecha cu lo tabata vigila si e boto a yega. E Toyota e asiento patras tabata kita. Aparentemente pa hinca droga den e auto. E Toyota tabata di ex pareha di J.S.O.
Hues a mustra cu esnan condena, esta e hombernan M. y I., a declara cu tanto J.S.O. como E.A. ta envolvi den e importacion di droga. J.S.O. a bisa Hues cu e dia di hiba e boto, e no tabata eynan. El a bisa cu Polis a mustr’e potret di un hende den e auto cu lo ta J.S.O. pero esey no ta e. El a bisa cu e tin tattoo na tur dos man y e persona riba potret no tin tattoo.
GARA NA AEROPUERTO CU DROGA
Hues a mustra cu na October 2024, Polis a detene E.A. na aeropuerto ora e tabata kier a viaha pa Hulanda cu cocaina. Den e maleta a constata cu tabatin dos deken hopi pisa. Investigacion a mustra cu a mescla cocaina den e dekennan. A haci un proceso pa haya sa cuanto cocaina tabatin den e dkennan. En total tabatin 507,7 gram di cocaina mescla den dos deken. E.A. a declara na Polis, cu su intension tabata di hiba e droga Hulanda pa gana placa pa cubri gastonan medico. Parce cu E.A. ta sufri di curason.
HAYA BLOKI DI COCAINA
Hues a mustra cu den apartamento di J.S.O. a haya un mitar bloki di cocaina cu a pisa 505,8 gram. Segun J.S.O., esey ta pa su mesun uso. Hues a remarca cu e cantidad ta hopi pa propio uso.
MALTRATA PAREHA
Hues a mustra cu 13 October 2024, J.S.O. lo a maltrata su ex pareha door di dal’e wanta y a hink’e of cort’e. J.S.O. a bisa Hues cu esey ta pasado. El a splica cu nan tabata come na un lugar y el a bebe di mas biña y a bira burachi y a maltrata su pareha. El a bisa cu e no ta corda kico a sosode. Hues a bisa cu e pareha a bisa cu tabatin un discusion y apesar cu nan yiu tabata tey, J.S.O. a dal’e y a core cu un cuchiu. J.S.O. a bisa cu e ta lamenta kico a pasa.
Ta asina cu E.A. tin 164 dia sera y J.S.O. 133 dia sera. Hues a mustra cu E.A. na 2012 a wordo condena pa droga y na 2016 condena pa arma di candela. J.S.O. ta promer biaha cu e ta cay den man di husticia pa droga.
FISCAL
Fiscal a bay hopi extenso riba tur e observacionnan di camera y investigacion di Polis. Fiscal a bisa Hues cu e ta haya legalmente proba cu J.S.O. y E.A. ta culpabel den importacion di un lote grandi di cocaina riba 8 Juni 2024 den oranan tempran di mainta na Eagle Beach. Mas di 700 paki di droga y 3 revolver a wordo haya den e boto. Na opinion di Fiscal, investigacion di Polis ta mustra claramente cu J.S.O. y E.A. tabata envolvi den e preparacion di e boto di E.A., cual a wordo usa pa importacion di e lote grandi di droga. Fiscal tambe a mustra cu tin combersacionnan cu Polis a haya riba cellular di E.A. cu ta mustra riba e importacion di droga. Fiscal ta haya nan complice di importacion di e lote grandi miyonario di cocaina y marihuana.
NO PROBA POSECION DI ARMA
Fiscal a bisa Hues cu e no ta haya proba cu E.A. y J.S.O. tabatin conocemento di e 3 revolvernan cu a haya den e boto y el a pidi Hues pa declara nan liber di e acusacion aki.
Fiscal a mustra cu na aeropuerto E.A. a wordo gara cu dos deken cu cocaina mescla aden. En total 507,7 gram di cocaina. Tambe a haya J.S.O. cu un mitar bloki di cocaina. Fiscal tambe ta haya cu J.S.O. a maltrata su ex pareha.
EXIGI CASTIGO PISA
Fiscal ta haya cu E.A. tabatin un funcion di coordina importacion di droga. El a tene cuenta cu E.A. tin condena caba pa droga. Fiscal a bisa cu E.A. a wordo gara na aeropuerto cu cantidad di cocaina pa hiba Hulanda. El a mustra cu e hombernan M. y I. a wordo condena na 7 aña di prison pa a trece e lote di droga den boto. Fiscal ta haya cu e funcion di E.A. y J.S.O. ta mas pisa. El a exigi pa E.A. 10 aña di prison y pa J.S.O. 9 aña di prison.
Hues a sera tratamento di e caso y a bisa cu dia 30 Maart 2026 lo tin sentencia.
