Riba dia di nos Himno y Bandera, Archivo Nacional Aruba (ANA) ta presenta un exposicion nobo, titula “E Eco di Nos Pasado – resonando a traves di nos herencia (in)tangibel!” Den cuadro di e celebracion di 40 aña di nos Status Aparte y 50 aña di nos Himno y Bandera, ANA a scohe pa dedica e celebracion special aki na nos historia, nos herencia cultural y na nos hendenan di pasado, pero tambe na e balor cu e patrimonio historico-cultural tin pa existencia di nos pais Aruba.
Herencia no ta solamente un recuerdo di pasado; e ta un vibracion bibo di nos antepasadonan cu ta sigui resona den nos presente. Na Aruba ora nos papia di “E Eco di Nos Pasado”, nos ta reconoce cu nos herencia tangibel, e casnan di calki y di cunucu, e hermentnan di cunucu, y obheto historico, ta fungi como e murayanan cu ta rebota e bosnan di ayera pa nan yega cerca nos awe.
Pero e eco mas profundo ta sinta den loke ta intangibel: e ritmo di nos musica, e smaak di nos cushina, e sabiduria den nos dichonan y e calor di nos Papiamento. Esakinan ta e econan cu ta resona directamente den nos curason y den nos identidad.
E exposicion “E Eco di Nos Pasado” ta invita nos pa scucha con e pasado ta papia cu nos y reconoce con e eco di nos historia ta sigui resona den nos bida. E reflexion aki ta conecta cu dos momento fundamental di nos historia: 50 aña di nos himno y bandera y 40 aña di Status Aparte, e simbolonan cu a nace den pasado, pero cu te ainda ta vibra den e consciencia di nos nacion. E vibracionnan aki por ta den cosnan simpel, manera por ehempel den hisamento di flie. Pero tambe den logronan grandi cu ta refleha den e sentimento patrio cu nos tin pa nos pais. Esaki nos ta wak e bek den nos hendenan, sea naci aki of descendiente di Arubianonan, cu ta hiba nomber di nos pais Aruba unda cu nan bay. Sea ta den deporte, arte, musica, sciencia of belleza.
Na Archivo Nacional Aruba nos ta conserva y documenta nos herencia a traves di documento, fotografia y otro fuente historico. Cada piesa ta un fragmento di memoria cu ta conecta pasado cu presente. Pesey tambe ta importante pa nos realisa e importancia di conoce y conserva e herencianan tangibel y intangibel aki.
Y den cuadro di e celebracion grandi aki e aña aki, esta e celebracion di 40 y 50, Archivo Nacional ta lansa su edicion nr. 2 di su Campaña “3C”, cu ta wordo pronuncia TRECE. E 3 “C”-nan ta para pa COLECTA, CONOCE y CONSERVA! Den e cuadro di e dos aniversario asina importante pa nos pais Aruba, Archivo Nacional Aruba kier motiva nos comunidad, pa hunto nos trata na conserva partinan di nos patrimonio cultural-historico pa asina nos percura pa e “Eco di Nos Pasado” sigui resona tambe pa nos futuro generacionnan. Pesey si bo tin documentonan, of otro tipo di material, sea ta potret, pelicula, film, manuscrito, publicacion of obhetonan, cu bo ta kere of sinti cu mester wordo cuida, warda y exponi, bo por trece esakinan libremente na ANA.
Archivo Nacional sigur ta para tras di conservacion y haci accesibel tur loke ta parti di nos patrimonio cultural-historico (in)tangibel! Y por medio di e campaña “3C” hunto nos ta contribui na e “Eco di Nos Pasado”.
Un pueblo cu sa scucha e eco di su herencia, ta un pueblo cu sa ken e ta y unda e ta bay; sa cu loke nos haci awe lo resona den futuro!
