Despues di e prome weekend di wega tras di lomba, Federacion Arubano di Futbol (AVB) a realisa algun ahustacion pa e categorianan U-5 y U-7. Entrante e siman aki, e weganan lo continua na C.D.G.T. (Centro Deportivo Guillermo Trinidad) na Dakota bou di reglanan mas stret pa garantisa orden y seguridad.
Den un comunicado oficial, Competition Manager Harvey Clement a informa e clubnan cu e re-alocacion aki tin como meta principal pa eleva e nivel di organisacion y duna e muchanan un ambiente mas structural pa hunga nan deporte faborito. Pa e motibo aki, ta pidi tur club, lider y mayor pa tene cuenta cu e siguiente puntonan di importancia:
- Punto di Acceso: Tur persona, incluyendo hungado, entrenado, lider y mayor, mester uza e entrada cu ta keda banda di Entertainment Center (Nagico).
- Restriccion riba Tereno: No ta permiti acceso di mayor riba e tereno di wega ni riba e pista di atletismo. Solamente hungadonan, entrenadonan, lidernan y coordinadonan di AVB tin mag di ta den e area aki.
- Cuminda y Bebida: Pa mantene e facilidad den bon estado, no ta permiti pa subi tereno cu cuminda of bebida. E hungadonan so por tin nan mesun thermo of tumbler cu awa.
- Servicio di Bar: E bar y cushina lo ta situa unicamente den e tribuna parti pariba. Tur otro entrada parti pabou di e facilidad lo keda sera pa publico.
Directiva di AVB ta enfatisa cu e cooperacion di tur club miembro ta esencial. Ta pidi tur lider pa informa e mayornan debidamente riba e reglanan aki pa asina garantisa un ambiente sano y organisa pa e participantenan mas chikito.
