Un ceremonia solemne simbolico, di historia y orguyo nacional a tuma lugar dia 16 di maart na Monumento Plaza 18 di Maart na Oranjestad, como parti di e celebracion di 50 aña di Himno y Bandera di Aruba y 40 aña di Status Aparte. E acto a reuni representante di gobierno, organisacionnan, famia di firmantenan historico y miembronan di comunidad pa recorda e lucha cu a marca e caminda di Aruba pa autonomia.
E ceremonia a cuminsa cu musica di fondo interpreta pa steelpanista Nico Connor, mientras invitadonan a tuma asiento. Poco despues a anuncia e yegada di mandatarionan y e entrada solemne di Bandera di Aruba, carga pa miembronan di padvinders. Acto seguido, Himno di Hulanda sigui despues caminda Loutiza Raven a interpreta e Himno Nacional “Aruba Dushi Tera”, creando un ambiente di respet y patriotismo entre tur esnan presente.
Ofrenda floral na honor di e lucha pa autonomia
Como parti central di e ceremonia, diferente organisacionnan a pone krans na e monumento pa honra e generacion cu a inicia e lucha pa autodeterminacion di Aruba. E prome ofrenda floral, presenta Valerie Eman, representando e famia Eman. Segidamente, representantenan di Partido AVP, Fundacion Monumento 18 di Maart y Gobierno di Aruba tambe a pone nan krans den señal di respet pa e historia di e movimento.
Durante e programa, Saphire Croes a declama un poema special scirbi pa Yolanda Croes, dedica na e lucha pa Status Aparte y e sacrificio di generacionnan anterior.
Mensahenan di reflexion riba historia di Aruba
Durante e ceremonia tambe a tuma luga varios discurso. Honorable miembro di Parlamento Clifford Heyliger a comparti reflexion riba e importancia di preserva memoria historico di Aruba y e rol di pueblo den e proceso di desaroyo nacional.
Honorable miembro di Parlamento Muzaninne Wever, como presidente di Fundacion Monumento 18 di Maart, a subraya e importancia di e monumento como simbolo di participacion di ciudadania y compromiso cu futuro di Aruba.
Candela eterno ta cendi bek
Un di e momentonan mas emotivo di e anochi tabata e ceremonia simbolico di bolbe cende e candela eterno na e monumento. Descendientenan di algun di e 2.147 firmantenan di e peticion historico di 1947 a participa den e acto, ilustrando con e lucha pa autodeterminacion a cuminsa cu e bos di pueblo.
E candela simbolico representa e luz di e lucha y e esperansa cu a guia Aruba den su camino pa autonomia.
Cultura y talento hoben presente
E ceremonia tambe a inclui presentacionnan cultural cu talento hoben di Aruba. Entre nan tabatin Ariella Maduro, ganador infantil (categoria 4–6 aña) di e festival Un Canto pa Aruba, cu a interpreta su cancion “Pabien Aruba”.
Despues, Elias Kamperveen, ganador infantil (categoria 7–9 aña), a presenta su cancion ganador “Soppie Cultural”.
E anochi cultural a continua cu presentacion di baile di e grupo Pierewietje & Flash, bou direccion di Martha Figaroa, cu a presenta tres baile cultural: Mundo ta un Milager, Abo So y Tene mi Man.
“Autodeterminacion ta nace for di e curason di pueblo”
Durante su discurso, Prome Minister Mike Eman a reflexiona riba e significado profundo di e lucha pa autodeterminacion di Aruba y e esfuerso extraordinario di e generacion cu a inicia e movimento.
Segun Eman, e peticion historico cu a reuni 2.147 firma den apenas 90 dia ta un testimonio poderoso di determinacion di pueblo Arubiano.
“E esfuerso di nos antepasadonan ta merece gran admiracion. Den menos di tres luna nan a logra organisa 42 reunion y reuni 2.147 firma pa expresa e deseo di pueblo pa autodeterminacion.”
El a enfatisa cu e lucha pa autonomia nunca tabata un iniciativa di un solo lider politico, sino un sentimento profundo cu a brota den e alma di pueblo.
“Ta imposible pa un lider politico invita ciudadano pa un causa y mesun dia 2.147 persona ta firma. Esaki tabata algo cu a biba hopi tempo den e curason di pueblo.”
Durante su discurso, el tambe a cita palabra di su abuelo Henny Eman, cu ya den añanan binti tabata enfatisa cu, prosperidad di un pais mester wordo comparti hustamente entre su pueblo.
“Loke Dios provee pa un pueblo y un pais mester wordo reparti hustamente entre e poblacion.”
Na final di su palabra, Prome Minister Eman a expresa su gratitud na tur esnan cu a forma parti di e ceremonia y a subraya cu e lucha historico tabata posible danki na determinacion di pueblo Arubiano.
“Ningun lider por a cana e caminda aki sin un pueblo cu a determina, cu tin curashi y cu a sinti den su curason e deseo ferviente pa un futuro miho pa Aruba.”
El a conclui su discurso cu un mensahe di speransa y compromiso pa generacionnan presente y futuro.
“Danki na tur esnan cu a forma parti di e lucha. Dios bendishona boso mientrastanto nos lo sigui lucha y sigui marcha pa Aruba.”
Despues di e ceremonia protocolar, esnan presente a comparti un brindis y a disfruta di musica interpreta pa Academia Musical di Harpa y Cuarta, bou direccion di Edgar Kelkboom, marcando un cierre digno pa un anochi dedica na historia, identidad y orguyo di pueblo Arubiano.
