Su Mahestad Rey Willem-Alexander di Reino Hulandes a yega Aruba dialuna anochi, pa un bishita oficial den marco di e celebracionnan nacional historico pa Aruba cu ta tuma lugar den e luna di maart.
Su Mahestad a aterisa na Aeropuerto Internacional Reina Beatrix dialuna, rond di 21:19 di anochi. Na su yegada, el a wordo ricibi na pia di e trapi di avion pa Su Excelencia Gobernador di Aruba, Sr. Juan Alfonso Boekhoudt, hunto cu su esposa Sra. Hanneke Boekhoudt-Koetse, conhuntamente cu Minister-Presidente di Aruba, Sr. Mike Eman, hunto cu su esposa Sra. Doina Eman, Nicole Hoevertsz Presidente di Comison Bishita Real, Wesley Veltman Adjudant di Gobernador y Laurens Warnink Director Gabinete di Gobernador.
E bishita di Su Mahestad ta cay den un aña di gran significado historico pa Aruba. Na 2026 Aruba ta conmemora dos aniversario importante: 50 aña di e Himno y Bandera di Aruba (1976–2026) y 40 aña di Status Aparte (1986–2026). E momento historico aki ta refleha e desaroyo politico di Aruba y su posicion unico den Reino Hulandes y Caribe.
Cada aña riba 18 di maart, Aruba ta celebra Dia di Himno y Bandera, un dia nacional dedica na identidad, cultura y historia di nos pais. E introduccion di Himno y Bandera nacional na 1976 a marca un paso importante den e caminda di Aruba su autonomia, cu a culmina den e logro di Status Aparte riba 1 di januari 1986.
Presencia di Su Majestad Rey Willem-Alexander durante e periodo conmemorativo aki ta subraya e relacion historico y fuerte cu ta existi entre Aruba y Reino Hulandes. Demonstrando e balor di Aruba su cultura, historia y posicion den Reino.
Durante e bishita di Rey Willem-Alexander, su Mahestad lo participa den un serie di actividad y encuentro cu representantenan di Gobierno di Aruba, Ministernan, miembronan di Parlamento, y diferente sector di nos comunidad. E programa ta inclui, entre otro, un encuentro cu fraccionan di Parlamento y miembronan di Conseho di Minister na Fort Zoutman, participacion den e ceremonia central di conmemoracion di 40 aña di Status Aparte y 50 aña di Himno y Bandera, un bishita na Piscina Olimpico Roly Bisslik na Savaneta unda lo marca e inicio di construccion di un piscina nobo, y un bishita na Marinierskazerne Savaneta pa un briefing tocante siguridad y situacion geopolitico den region. Ademas, lo tin conversacionnan tematico riba turismo y inmigracion cu representantenan di diferente sector, participacion den un actividad di “reforestation and urban greening” y un bishita na Fundacion Movemiento ta Bida, kende ta e ganador di e premio Appeltje van Oranje 2024.
Rey Willem-Alexander a bishita Aruba anteriormente tambe na 2023, unda Su Mahestad Rey Willem-Alexander, Su Mahestad Reina Máxima y Su Alteza Real Catharina-Amalia, Prinsesa di Oranje, a participa den diferente actividadnan oficial y a sostene encuentro cu representante di gobierno y comunidad. E regreso di e Rey e aña aki ta enfatisa e importancia di e celebracionnan nacional y e cooperacion y relacion continuo y fuerte dentro di Reino.
E bishita di Rey tambe ta forma parti di un serie di actividadnan cu ta tuma lugar durante e luna di maart, culminando na e celebracion di un aña di Gobernacion di Aruba na final di maart. E actividadnan aki ta brinda oportunidad pa reflexiona riba nos institucionnan democratico, logronan pa e pueblo di Aruba y progreso di Aruba como pais.
