E dianan ta dificil, e tempo ta trabahoso, hende ta cambia, hende ta perde temor pa Dios,inmoralidad y amor pa placa kier surpasa, decencia, amor y dominio propio, ta parce manera un nubia scur kier tapa mundo henter, pero nos tin cu keda corda, si corda di berdad cu Dios ta donjo di tur cos, E ta Senjor Soberano, y tur cos ta depende di Dios, E ta pone y kita, E ta cambia tur cos , E tin poder, pesey nos mester sirbi Senjor di henter nos curason.
Si un hende bisa bo cu e ta stima bo, y e ta comparti su amor cu otro hende tambe, e momento bo ta descubri cu e no ta serio, e no ta balora, e no tin palabra, e ta un mentiroso, of e ta falso, pasobra abo a kere cu su amor ta pa bo so.
Awor que hubo di nos amor pa Dios, nos curason ta pertenece solamente na Dios? Of nos curason ta sali di paranda , y lora bocht den buracheria , tuma tempo den desobediencia, lubidando cu nos curpa ta tempel di Dios y e Spirito di Dios ta biba den nos.
Nos ta tuma vacantie for di Senjor, miemtras cu Dios ta fiel tur momento na nos, pasobra Dios sa cu e mester ta cu nos tur momento, pasobra si no tabata asina e enemigo lo a devora nos dia bieu.
Dios ta fiel,door di kende boso a wordo yama den comunion cu su Yiu,Hesus Cristo nos Senjor. ( 1 Corintionan 1:9).
Nos ta yega nos trabao tempran, nos ta yega fiesta tempran, nos ta yega nos cita tempran, awor kico tin ora nos mester bishita cas di Dios, dicon nos no por yega na ora, dicon Senjor tin cu warda riba nos, y acepta cu nos ta laat mayoria biaha.
Nos sirbishi na Dios, ta duna un ehempel con nos bida ta, si nos sirbishi ta constant, nos bida tambe lo ta organisa, pasobra nos ta pone Dios na prome lugar, pero e manera cu nos ta trata Dios, ta wordo mira den nos bida social, pasobra bo no por ta bon cu Dios y na malo cu hende, bo no por stima Dios y odia bo ruman, pesey sin cu bo mes sa, e ta wordo nota con abo personalmente ta trata Dios, sea bo tin Dios como sparetire of bo tin Dios como Capitan,
Ora nos lesa 2 Timoteo 3 :1-5 Nos mira con hende ta cambia, y con hende ta trata Dios, nos por samina nos mes y wak na unda nos ta.
Ora nos lesa Galationan 5:19-21, nos por saca afo pa nos mes na unda nos ta cana, sea cu e obranan di carni ta broma den nos bida of e fruta di Spirito Santo ta goberna.( Galationan 5:22-23).
Tur loke boso ta haci , haci boso trabao di curason, como pa Senjor no pa hende, sabiendo cu for di Senjor boso lo ricibi e recompensa di e herencia, Ta Senjor ta Esun cu boso ta sirbi.( Colosensenan 3:23-24).
Yui chikitonan no laga nos stima cu palabra ni cu lenga , ma cu hecho y berdad, na esaki nos lo sa cu nos ta di e berdad, y lo sigura curason dilanti di dj’E. ( 1 Juan 3:18-19).
Stimanan si nos curason no ta condena nos,nos tin confiansa dilanti di Dios, y kico cu nos pidi nos ta ricibi for di dj’E, pasobra nos ta warda Su mandamentonan y ta haci cosnan cu ta agradabel den Su bista.
Sirbi Dios di curason.
Sinceramente, Pastor Marcel Balootje
