Na Fort Zoutman, e edificio di beton mas bieu di Aruba y un sitio di defensa historico na Oranjestad, Su Mahestad Rey Willem-Alexander a encontra cu lidernan di fraccionnan di Parlamento di Aruba y e Conseho di Minister. Na su yegada, e representantenan di Comision Celebracion Dianan Nacional (CCDN) a ricibi Su Mahestad.
Na entrada di Willem III Toren, e rey a saluda señora Ciria Quant, kende ta celebrando su di 100 cumpleaños riba 18 di maart. Esaki tabata un momento simbolico den cuadro di nos celebracionnan nacional.
Durante e combersacion, a reflexiona riba momentonan historico significativo pa Aruba y pa e Reino Hulandes, incluyendo 70 aña di Statuut, 40 aña di Status Aparte di Aruba y e 50 aniversario di nos Himno y Bandera.
Den e contexto aki, a recorda tambe e lucha historico pa autonomia di Aruba, impulsa pa lidernan grandi manera Shon A. Eman, kende riba dia 18 di maart 1948 a prensenta e mocion reconociendo e derecho di Aruba pa separacion administrativo. Tambe a duna balor na e vision di Betico Croes, cu a lidera e movemento popular pa logra e Status Aparte.
Despues di e encuentro na Fort Zoutman, Su Mahestad a sigui den direccion di Bestuurskantoor pa continua cu e programa oficial di e celebracionnan nacional. Na caminda pa Bestuurskantoor, diferente grupo di padvinder a para pa saluda e delegacion real, mientras cu musica di steelpan a crea un ambiente festivo durante e celebracionnan.
E encuentro aki a reafirma e balor di dialogo y cooperacion entre e institucionnan democratico di Aruba y e Reino Hulandes. E presencia di Su Mahestad no solamente a fortalece e lasonan den Reino, sino tambe a duna un nificacion special na e celebracionnan historico di nos isla.
