Durante su bishita na Aruba, Rey Willem-Alexander a forma parti di un actividad enfoca riba naturalesa y medio ambiente, cu ta forma parti di e iniciativa “Vergroening Aruba”. E evento a tuma luga na Urban Pocket Park na Oranjestad, cerca di Plaza Monument der Gevallenen na Adriaan Laclé Boulevard.
E Rey a wordo ricibi pa e conseheronan di naturalesa y medio ambiente Françielle Laclé y Daphne Every, hunto cu Minister President Mike Eman y Minister di Vivienda, Infrastructura, Servicio Interno y Telecomunicacion Rene Herdé. Durante e bishita a duna un splicacion tocante e programa Nacional di Reforestacion y Berde Urbano, cu tin como meta pa mehora medio ambiente y e calidad di bida na nos isla.
Como parti di e actividad, dignatarionan y hobennan di diferente organisacion a planta aproximadamente 140 palo, cu sosten di boluntarionan. Durante un paseo den e parke, Rey Willem-Alexander a papia cu Minister Herdé tocante e vision pa desaroyo urbano di Oranjestad.
Na e actividad tawatin representantenan di varios organisacion di hoben y institucion social, entre nan organisacionnan cu ta brinda sosten na mucha cu limitacion manera Trampolin pa Trabou y FEPOH, hunto cu representante di scolnan di Educacion Special, Deporte Hubenil y Parlamento Hubenil di Aruba. Durante un combersacion informal, e hobennan a comparti nan motivacion pa contribui na proteccion di naturalesa y pa haci Aruba mas berde.
E momento cu mas a resalta durante e actividad tawata ora Rey Willem-Alexander, Gobernador di Aruba Alfonso Boekhoudt, Minister President Mike Eman y Minister di Vivienda, Infrastructura, Servicio Interno y Telecomunicacion Rene Herdé a planta un palo nativo grandi, un Pal’i Sia Cora, mey mey di e parke. E actividad a culmina ora a saca un portret di ful e grupo di boluntario di e organisacionnan hubenil hunto cu resto di e participantenan.
Despues di esaki, e delegacion a sigui nan programa cu un bishita na Fundacion Movemiento ta Bida.
