Minister di Finansa, Asunto Economico y Sector Primario, mr. Geoffrey Wever, ta felicita Santa Rosa cu a organisa e mercado, Comison Pro Cunukeronan Arubiano cu a uni kende ta un bos importante den sector primario, tur stakeholders y vendors pa un mercado exitoso, un bes mas.
Tambe, Minister Wever ta invita pueblo di Aruba pa bishita e siguiente mercado di Santa Rosa cu lo tuma lugar diasabra awor, maart 21.
Desde 7 maart , e mercado di Santa Rosa ta sigui tuma lugar tur siman, manera a anuncia. Esaki a bin na vigor, despues di a combersa cu varios stakeholders importante den sector primario, na unda nan a indica e deseo y importancia pa tene e mercado cu mas frecuencia. Considerando e popularidad di e mercado, e bienestar di e sector y e deseo di e stakeholdernan, Minister Wever a tuma stapnan dibiaha pa realisa e deseo aki den algo concreto y awor pueblo di Aruba por disfruta di e mercado di Santa Rosa tur siman.
E mercado di siman pasa, 14 maart tawata uno bon bishita y un exito.
26 bendedo a bini hunto y participa na e mercado, esaki ta demonstra e importancia di bini hunto como un sector y por wak e exito di mercado como consecuencia positivo.
E sector primario ta importante, y ta un sector di enfoke pa e ministerio di Minister Wever. Na e mercado di Santa Rosa, pueblo por disfruta di cumpra varios producto fresco y local.
Participando den e mercado aki como un consumidor, bo persona ta aportando na e economia local di Aruba, y tambe e cunukero y agricultornan di nos isla. E mercado aki lo tuma lugar 3 siman na Santa Rosa y un siman na Plaza Lolita durante Pop-Up Market na San Nicolas.
Ta importante tambe pa comparti cu si bo persona kier participa cu bendemento di producto na e mercado di Santa Rosa, registra na tempo ya cu espacio ta limita.
Por registra cerca Santa Rosa via un email na info@santarosa.aw of por pasa personalmente na e oficina di Santa Rosa cu ta situa na Piedraplat 114-A. Tambe por tuma contacto via telefon na 585-8102
Minister mr. Geoffrey Wever ta felicita Santa Rosa pa e bon trabou di organisa e mercado, Comison Pro Cunukeronan Arubiano, stakeholders y tur esnan cu a participa, pa e trabou dedica cu nan ta eherciendo y pa e apoyo cu nan ta duna na e sector primario. E sector primario ta forma un parti integral di nos cultura y nos economia.
Nos ta invita pueblo henter pa bishita e Mercado di Santa Rosa diasabra awo, 21 maart y forma parti di crea un impacto positivo den nos economia y nos comunidad.
